Kryetari i LDK-së, Lumir Abdixhiku, në dyvjetorin e sulmit në Banjskë ku u vra rreshteri Afrim Bunjaku ka thënë se ai humbi jetën duke mbrojtur sigurinë dhe sovranitetin e vendit.
Abdixhiku ka shtuar se rreshteri Bunjaku ka dëshmuar se shërbimi ndaj atdheut është mbi çdo gjë personale.
“Sot, shënohen dy vjet nga rënia në detyrë e policit të Republikës së Kosovës, heroit, Afrim Bunjaku, i cili humbi jetën duke mbrojtur sigurinë dhe sovranitetin e vendit tonë. Afrim Bunjaku, u vra nga pjestarë të një grupi terrorist të sponsorizuar e komanduar nga Serbia, derisa po ushtronte punën, duke dëshmuar se shërbimi ndaj atdheut është mbi çdo gjë personale. Por Afrim Bunjaku nuk ishte vetëm një polic në krye të detyrës. Ishte një njeri me vlera të mëdha, që zgjodhi të qëndrojë deri në fund për parimet e lirisë, drejtësisë dhe rendit demokratik”.
