Kryetari i Lidhjes Demokratike të Kosovës, Lumir Abdixhiku, i ka quajtur ditë feste zgjedhjet e sotme lokale.
Ai pasi votoi në kryeqytet, tha se zgjedhjet e sotme janë ditë kur vendimmarrja kthehet te qytetarët për katër vitet e ardhshme.
“Zgjedhjet në Kosovë gjithmonë kanë qenë, janë dhe do të mbesin festë e madhe e demokracisë. Janë ditë kur vendimmarrja kthehet te qytetarët e Kosovës për katër vitet e ardhshme, për qytetet, lagjet dhe fshatrat e tyre. Le të urojmë, punojmë dhe shpresojmë që Kosova do të jetë shembull i organizimit të zgjedhjeve, demokracisë dhe vullnetit të lirë të qytetarëve të Kosovës… Le të jetë ditë feste dhe ditë e demokracisë. Kosova duhet të jetë krenare me procesin zgjedhor”, tha ai.
I pyetur për mbledhjen e qytetarëve nga Lista Serbe në Mitrovicë të Veriut që të votojnë në mënyrë të organizuar, Abdixhiku tha se ai bazohet në organet zyrtare KQZ-në, Prokurorinë dhe Policinë dhe se iu beson të njëjtave.
“Unë do të bazohem në organet zyrtare të Kosovës, KQZ-në, Prokurorinë e Kosovës dhe Policinë e Kosovës. LDK dhe unë shpreh mbështetjen dhe besimin e plotë në këto tri institucione. Çdo vendimmarrje e tyre do të jetë vendimmarrja jonë,” përfundoi ai.
