Kryetari i Lidhjes Demokratike të Kosovës, Lumir Abdixhiku, në një postim në Facebook të shtunën në mbrëmje ka shkruar se është “koha e fundit për një rrugë të re pa Kurtin dhe politikën e tij të izolimit”,
Duke e akuzuar Qeverinë e kryeministrit Albin Kurti për përjetimin e sanksioneve nga ndërkombëtarët, Abdixhiku ka thënë se “Albin Kurti dhe politika e tij nuk e bëjnë dot Kosovën shtet evropian”.
“Pezullim i fondeve të BE-së; Pezullim i MSA-së, Pezullim i takimeve të nivelit të lartë, Pezullim i vizitave bilaterale. Sanksione Kosovës, avancim për Serbinë. Si qenka kjo fitore për ne? Teksa ne përjashtohemi nga programet ushtarake me NATO-n; Serbia vazhdon misionet paqeruajtëse me ta. Teksa ne humbasim nga programi 7.5 miliardësh për zhvillim dixhital, shtetet e rajonit ecin me hapa të mëdhenj. Kam takuar në vazhdimësi biznese nga komuniteti i IT-së, punëdhënës të jashtëzakonshëm, me potencial dhe më të madh. Sot, humbasin ata dhe të rinjtë që do të punësonin në vazhdimësi”, ka shkruar Abdixhiku në Facebook.
Sipas Abdixhikut, “Kosova nuk ka qenë kurrë më keq ndërkombëtarisht sesa sot” e “Serbia nuk ka pasur kurrë më shumë përkrahje sesa tani”.
Abdixhiku ditë më parë bëri thirrje për “rrugë të re”. Ai paralajmëroi takime me akterë të shoqërisë për të ndërtuar “rrugën e vërtetë”. Është shprehur se në “rrugën e re e të vërtetë, nuk ka Albin Kurti”.
