Aleanca për Ardhmërinë e Kosovës (AAK) ka kërkuar që të ftohet në interpelancë ministri i Financave, Hekuran Murati.
Këtë e ka bërë të ditur shefi i Grupit Parlamentar të kësaj partie, Besnik Tahiri në një konferencë për media.
Kjo, pasi sipas tij, Qeveria ka ndërhyrë në strukturën e të hyrave dhe të shpenzimeve buxhetore dhe se kjo ka qenë shumë e dëmshme në rrjedhat e zhvillimit në vend duke i ngritur normat e tatimit në njërën anë, e në anën tjetër duke i bllokuar investimet kapitale.
“Ndërhyrja e Qeverisë në strukturën e të hyrave dhe të shpenzimeve buxhetore ka qenë shumë e dëmshme në rrjedhat e zhvillimit në vend duke i ngritur normat e tatimit në njërën anë, e në anën tjetër duke i bllokuar investimet kapitale. Vetëm për dy vjet qeverisje janë bllokuar rreth 500 milionë euro të investimeve kapitale, me çka është dëmtuar ekonomia e vendit për rreth 200 milionë euro si pasojë e inflacionit dhe vonesës se investimeve kapitale”, ka thënë Tahiri.
Ndër të tjera, Tahiri ka thënë se gjendja e rëndë socio–ekonomike në vend e krijuar nga niveli i lartë i inflacionit, rritja e çmimeve të konsumit, shtrenjtimi i çmimit të energjisë dhe vendimi për rritjen e tatimit në pronë ka bërë që qytetarët të përballen me vështirësi të shumta.
Ai ka theksuar se rritja e pagave në sektorin publik do të ishte zgjidhje që do të lehtësonte sado pak këtë situatë teksa ka theksuar kërkesën që sa më parë të sillet në Kuvendin e Kosovës rishikimi i buxhetit për vitin 2023 dhe të përfshihet në këtë rishikim rritja e pagave në sektorin publik.
“Rritja e pagave në sektorin publik do të ishte zgjidhje që do të lehtësonte sado pak këtë situatë, pasi kjo është kërkesë e kohës. Kjo rritje do të duhej të ndodhte menjëherë me rishikimin buxhetor dhe kjo do të ndikonte në rritjen e konsumit të përgjithshëm por edhe indirekt në rritjen e pagave në sektorin privat. Nëse ky veprim nuk ndodh menjëherë, Kosova rrezikon të zbrazet dhe të mbesë pa shumë profesionistë të zotë”, ka vijuar ai.
