Mbi 430 kadetë sot i janë bashkuar Policisë së Kosovës, në mesin e tyre janë edhe 53 gra.
Të pranishëm në ceremoninë e diplomimit ishin edhe krerët e shtetit, si presidentja e Kosovës, Vjosa Osmani dhe kryeministri Albin Kurti.
Osmani ka thënë se në mesin e të diplomuarve janë 17 serbë, pesë boshnjakë, dy goranë, një turk dhe një rom.
Ajo ka shtuar në mesin e këtyre kadetëve janë 53 vajza dhe gra, të guximshme, të disiplinuara e të përkushtuara për t’i shërbyer vendit.
“Ju mbani një përgjegjësi të dyfishtë. Së pari të dashura vajza, do t’i shërbeni vendit dhe qytetarëve për garantim të rendit e sigurisë, por do të jeni inspirim për shumë gra e vajza që do të ndjekin rrugën tuaj. Kjo pjesëmarrje e grave tregon edhe angazhimin serioz për rritjen e numrit të grave në këto pozita. Besoj fuqishëm se pjesëmarrja e grave në polici dhe në të gjitha strukturat e sigurisë është investim i nevojshëm për sigurinë në gjithë vendin tonë”, ka thënë ajo.
Ajo ka thënë se sa më shumë vajza e gra të përfshira në siguri, aq më i sigurt do të jetë vendi.
Sipas saj, diversiteti gjinor e etnik në Policinë e Kosovës është pasqyrim i shtetit dhe reflektim i një mjedisi të sigurt që e meriton Kosova.
Osmani ka thënë se kadetët duhet të jenë krenar për uniformen e veshur.
Kurse kryeministri Albin Kurti ka uruar të gjithë policët e rinj, duke thënë se po forcohen radhët e shtetit.
“Për qeverinë tonë mbrojtja dhe siguria e vendit janë prioritet. Vetëm gjatë vitit të kaluar u realizuan 854 aksione kundër kontrabandës e korrupsionit. I shkatërruam 69 grupe kriminale. U konfiskuan 1.8 ton substanca narkotike. Dje, atje Policia e Kosovës janë shkatërruar tre laboratorë droge. Policia e Kosovës qëndron e palëkundur, ndryshimin dhe avancimin e saj e ndjejmë”, ka thënë mes tjerash Kurti.
Ai ka theksuar se policët kanë treguar se nuk bëjnë kompromis me bandat dhe krimin.
“Kolegët tuaj me angazhimin e tyre kanë treguar se nuk bëjnë kompromis me bandat edhe krimin. Janë sulmuar janë plagosur por nuk janë dorëzuar, përkundër kësaj ata janë akoma aty në krye të detyrë”, ka thënë Kurti.
Ministri i Brendshëm, Xhelal Sveçla ka thënë se sot është një ditë krenarie.
“Keni zgjedhur t’i shërbeni atdheut tonë të përbashkët dhe qytetarëve të saj. 433 vajza e djem të ri po i bashkohen policisë, institucionit kyç të shtetit tonë për mbrojtjen e integritetit e sovranitetit të vendit e luftimit të pa kompromis të krimit e korrupsionit”, ka thënë Sveçla.
Ministri ka shtuar se ky profesion kërkon zotim për të shërbyer me ndershmëri.
“Po i bashkoheni policisë në kohën më të nevojshme për vendin. Jam besimplotë se do të jeni nderi dhe krenaria e brezave dhe gjeneratave që do t’iu pasojnë”, tha Sveçla.
Sveçla pati edhe një kërkesë për kadetët e rinj: “çdo ditë kur vishni uniformën kujtoni betimin që do ta jepni sot. Mbani në mend se askush nuk është mbi të drejtën dhe se ligji është për të mbrojtur qytetarin. Duhet të jeni në zbatim të ligjit çdo ditë”, tha ministri.
