Policia e Kosovës ka njoftuar se të martën në Gjakovë ka arrestuar një person të dyshuar për vjedhje të rëndë.
Ai është arrestuar pasi që Policia kishte publikuar identitetin dhe fotografinë e tij dhe kishte kërkuar ndihmën e qytetarëve për informacione për të.
“Drejtoria Rajonale e Policisë në Gjakovë, me datën 31.01.2023 ka lëshuar kërkesë për bashkëpunim me qytetarë për arrestimin e personit Shqiprim (Tomë) Dedaj i lindur me 28.11.1984, banues në rrugën “Pashko Vasa” në Gjakovë i cili kërkohej për veprën penale ‘vjedhje e rëndë’”, thuhet në njoftimin e Policisë.
Në momentin e arrestimit atij i është sekuestruar një shumë e parave, që dyshohet se i kishte përvetësuar në kohën e kryerjes së veprës penale.
“Sektori Rajonal për Hetime, falë bashkëpunimit me qytetarë dhe media, pas publikimit të fotografisë së personit të kërkuar, ka arritur që për një kohë të shkurtë të siguroj informacion lidhur me vendndodhjen e të kërkuarit dhe të bëjë arrestimin e tij. Në momentin e arrestimit, në posedim të tij janë gjetur dhe janë sekuestruat një shumë parash të cilat dyshohet se ai i kishte përvetësuar në kohën e kryerjes së veprës penale, për të cilën ishte lëshuar kërkesë për bashkëpunim me qytetarë. Me vendim të Prokurorit të Shtetit i dyshuari është ndalur në mbajtje për 48 orë”, thuhet në njoftim.
