Jo të gjithë në Kosovë janë kundër Asociacionit të komunave më shumicë serbe. Madje ka persona që kërkojnë të bëhet Zajednica.
Një kërkesë të tillë e ka bërë sot edhe gazetari Berat Buzhala, i cili kundërshtimet e Qeverisë së Kosovës dhe kryeministrit Albin Kurti për këtë çështje i ka krahasuar si të ngjashme me veprimet e kasapit të Ballkanit, Sllobodal Millosheviq, që kreu masakra e gjenocid në Kosovë.
Buzhala përveç këtij krahasimi përdorë edhe gjuhë fyese, duke i quajtur “qyrra”, drejtuesit e shtetit që po kundërshtojnë të bëhet një asociacion një-etnik.
E ndaj kësaj ka pasur një reagim nga kabineti i kryeministrit të Kosovës.
Këshilltari i kryeministrit Kurti, Jeton Zulfaj, ka thënë se është për mjerim që një shqiptar i Kosovës e krahason kryeministrin e vendin me kasapin e Ballkanit, Sllobodan Millosheviq, i cili kreu gjenocid në Kosovë.
“Pra deri këtu ka arritur urrejtja ndaj Kryeministrit të Kosovës. Një shqiptar i Kosovës, i cili më herët kërkonte organizimin e zgjedhjeve të Serbisë në Kosovë e tash kërkon Asociacionin për Serbinë, e krahason Kryeministrin e Kosovës Albin Kurti me kasapin e Ballkanit Sllobodan Millosheviq i cili kreu gjenocid në Kosovë. Kur mendonim që nuk mund të binte më poshtë. Mjerim!”, ka shkruar Zulfaj në reagimin e tij të publikuar në rrjetin social.
Kohën e fundit faktori ndërkombëtar është duke rritur trysninë mbi Kosovën për zbatimin e marrëveshjes për themelimin e Asociacionit të komunave me shumicë serbe, ndërsa Qeveria e Kosovës vazhdon të kundërshtoj një krijim të tillë që bie ndesh me Kushtetutën e vendit.
Ndërkohë që Qeveria po kundërshton, faktori ndërkombëtar po planifikon takime me subjektet politike nga opozita dhe shoqëria civile për këtë çështje.
Marrëveshja për formimin e Asociacionit të komunave me shumicë serbe në Kosovë është nënshkruar 10 vjet më parë në Bruksel në kuadër të negociatave Kosovë-Serbi. Por, ajo nuk është zbatuar asnjëherë. Atë e nënshkruan krerët e Qeverisë që udhëhiqej nga koalicioni LDK-PDK./KosovaNews
