Zëvendësministri i Mbrojtjes, Shemsi Syla, i shoqëruar nga Ambasadori i vendit në Republikën e Maqedonisë së Veriut, Florian Qehaj dhe oficerë dhe zyrtarë të lartë të MM-së dhe FSK-së, u prit në takim nga zv.ministri i Mbrojtjes së Republikës së Maqedonisë së Veriut, Bashkim Hasani, zv. Shefi i Shtabit, gjeneral major Azim Nuredin, si dhe zyrtarë dhe oficerë të lartë, transmeton KosovaNews.
Me këtë rast, u bisedua për bashkëpunimin e mirë në mes të dy vendeve, si dhe mundësinë e thellimit të tij, me theks të veçantë në fushën e sigurisë.
Në këtë takim, zv.ministri Syla falënderoi homologun e tij për ftesën dhe theksoi se kjo tregon përkushtimin e dy vendeve për një rajon stabil dhe me perspektivë.
Me këtë rast, zv. Ministri Syla kërkoi nga pala homologe vazhdimin e përkrahjes në anëtarësimin e Republikës së Kosovës në iniciativat rajonale të sigurisë dhe në qëllimin final që ka, anëtarësimin në NATO.
Nga ana e tij, zv. Ministri i Mbrojtjes së Republikës së Maqedonisë së Veriut, Hasani theksoi se Republika e Maqedonisë së Veriut ka dëshmuar përkrahjen e pa rezervë të Republikës së Kosovës në të gjitha sferat, e sidomos në atë të sigurisë, duke shtuar se anëtarësimi i Kosovës në NATO do të përbënte një element shumë të fuqishëm të sigurisë në rajon. Në këtë takim po ashtu u bisedua për mundësinë e shkëmbimit të përvojave në mes të dy Ministrive, si në edukim, trajnim dhe stërvitje të stafit ushtarak të të dyja vendeve. Gjatë kësaj vizite zyrtare, delegacioni i Ministrisë së Mbrojtjes ka vizituar gjithashtu Komandën e Operacioneve ku u pritën nga Komandanti i Komandës, gjeneralbrigade Besnik Emini dhe oficerë të lartë me ç’rast u dha një prezantim i shkurtë për misionin dhe aktivitetet që ka kjo Komandë.
