Zëdhënësja e LDK-së, Sibel Halimi, ka kujtuar ish-presidentin Rugova, sot kur bëhen 17 vite që nga vdekja e tij.
Me anë të një postimi në Facebook, Halimi në ditën e përvjetorit të vdekjes së ish-presidentit Ibrahim Rugova, ka bërë të ditur se është mikëpritur nga bashkëshortja e tij zonja Fana.
Bashkë me Halimin, ishte edhe kryesia e LDK-së, përfshirë kryetarin Lumir Abdixhiku.
Ajo ka vlerësuar bashkëshorten e ish-presidentit si grua të fortë e cila i qëndroi afër bashkëshortit të saj, “intelektualit dhe vizionarit”, duke e inkurajuar në të gjitha proceset e rëndësishme të shtetndërtimit tonë.
Sipas Halimit, Kosova jeton në paqe falë urtësisë dhe vizionit të presidentit të parë.
Postimi i plotë:
Sot, në përvjetorin e 17-të, të përjetësisë së Presidentit historik Dr. Ibrahim Rugova, u mirëpritëm nga gruaja e fortë, e cila i qëndroi afër bashkëshortit të saj, intelektualit dhe vizionarit, duke e inkurajuar në të gjitha proceset e rëndësishme të shtetndërtimit tonë.
Zonja Fana, në një rishikim historie ndanë me ne momentet e së kaluarës, të cilat sot na bëjnë jo vetëm të rikujtojmë, por edhe të ndjejmë krenari.
Ne jetojmë në paqe, falë urtësisë dhe vizionit të Presidentit të parë e prijësit paqësor të shtetit të Kosovës!
Mendësia, e urtësia e Ibrahim Rugovës, duhet të jetë pasqyra ku sot duhet të shikohemi të gjithë, t`i thërrasim arsyes që të jemi të përgjegjshëm, në drejtimin e atdheut. Kosovës sonë. Të ardhmen e fëmijëve tanë!
