Kryetari i Gjilanit që vjen nga radhët e Lëvizjes Vetëvendosjes, Alban Hyseni ka folur lidhur me raportimet për kërcënime me atentat ndaj kryetarit të LDK-së, Lumir Abdixhiku dhe deputetëve të tjerë nga partia e tij.
Hyseni ka thënë se këto janë të panevojshme dhe të rrezikshme.
“Nuk e di për Zotin, tash me gjeneratat e reja të politikës, situata të tilla janë shqetësuese, kjo nuk është mirë që ndodh, me gjithë rivalitetin politik, deri në këtë nivel jo vetëm e panevojshme, por edhe e rrezikshme të shkohet”, ka thënë ai në ATV.
Ai ka thënë se duhet të presim për detaje për të parë se çfarë ka ndodhur.
“Tash nuk i dimë, duhet t’i presim detajet tjera për të parë çfarë ka ndodhur. Urojë të jetë gjithçka mirë dhe policia ta ketë situatën në dorë”, ka thënë ai pak çaste pas publikimit të lajmeve për atentate ndaj zyrtarëve të LDK-së.
Disa portale kanë raportuar dhe mandej zyrtarë të LDK-së deklaruan se ndaj kreut të LDK-së, Lumir Abdixhiku dhe tre deputetëve të tjerë, ka pasur kërcënime, por pa sqaruar se nga kush erdhën ato.
