Presidenti i Serbisë, Aleksandar Vuçiq ka deklaruar se Rezoluta e Parlamentit Evropian për harmonizimin e politikës së jashtme të Serbisë me BE-në, e cila u miratua ditën e djeshme, është hipokrite.
Sipas tij, pjesa më e keqe është ajo ku theksohet kërkesa e Kosovës për anëtarësim në BE.
“Megjithatë, kërkohet intensifikimi i dialogut në bazë të njohjes reciproke, që të dënohen një sërë lëvizjesh përshkallëzuese nga Serbia dhe aktorët e mbështetur nga Serbia, të cilat përfshijnë bllokada të paligjshme, sulme dhe kërcënime për veprime ushtarake, se pavarësia e Kosovës është e pakthyeshme dhe se anëtarët e BE-së që nuk e njohën Kosovën ta bëjnë këtë”, tha Vuçiç duke iu drejtuar gazetarëve në Forumin Ekonomik Botëror në Davos.
I pyetur se si e sheh Rezolutën e Parlamentit Evropian dhe faktin që kërkohet harmonizimi me politikën e jashtme, ai nënvizoi se kjo i intereson më pak se pjesa ku thuhet se Kosova është e pavarur.
Dje Parlamenti Evropian ka miratuar rezolutën për harmonizimin e politikës së politikës së jashtme dhe sigurisë së Bashkimit Evropian dhe një pjesë e këtij dokumenti i referohet Serbisë, duke iu drejtuar me qëndrimin se Beogradi duhet të përputhë politikën e jashtme me atë të BE-së.
Në raport, PE për herën e dytë i bën kërkesë zyrtare BE-së të ndalë negociatat me Serbinë deri të mbushë disa kërkesa thelbësore, dhe më e rëndësishmja është konsideruar harmonizimi i plotë i politikës së jashtme të Serbisë me të Bashkimit Evropian.
Nga 632 deputetë, 357 votuan për rezolutën, 180 ishin kundër e 95 abstenuan.
Parlamenti Evropian ka theksuar rëndësinë e harmonizimit të plotë me politikën sanksionuese kundër vendeve të treta. Aty Serbia kritikohet për nivelin e ulët të harmonizimit me politikën e jashtme të BE-së, sidomos me reagimin ndaj pushtimit rus të Ukrainës.
Parlamenti Evropian ka thënë se kapitujt e tjerë të negocimit duhet të hapen vetëm kur Serbia t’u përmbahet zotimeve për reformë në demokraci, sundim të ligjit dhe të harmonizojë plotësisht politikën e jashtme me të BE-së.
Europarlamentarët në rezolutë kanë kujtuar se Serbia “si shtet që përpiqet të integrohet, duhet t’u përmbahet vlerave të përbashkëta”.
Po ashtu, në Rezolutë kritikohet Serbia për kërcënimet e saj ndaj Kosovës dhe për përpjekjet destabilizuese përmes aktorëve dytësor në Kosovë. Theksohet pakthyeshmëria e pavarësisë së Kosovës dhe u bëhet thirrje pesë anëtarëve të BE-së që nuk e kanë njohur Republikën e Kosovës ta njohin atë sa më parë.
