Ministri i Punëve të Brendshme të Kosovës, Xhelal Sveçla përmes një postimi në Facebook ka reaguar për tragjedinë që ndodhi afër Kievit në Ukrainë, ku humbi jetën ministri i Brendshëm ukrainas, Denys Monastyrsky, zëvendësi i tij i parë Yevheniy Yenin dhe disa presona të tjerë.
Raportimet e deritashme tregojnë se tetëmbëdhjetë persona janë vrarë, përfshirë ministrin e Punëve të Brendshme të Ukrainës zëvendësin e tij dhe sekretarin e shtetit, pasi një helikopter u rrëzua pranë një kopshti fëmijësh në lindje të kryeqytetit Kiev.
“Jemi tronditur nga tragjedia e ndodhur afër Kievit me ç’rast ka humbur jetën Ministri i Brendshëm i Ukrainës Denys Monastyrsky, Zëvendësi i tij i parë Yevheniy Yenin, zyrtarë të Ministrisë e fëmijë që ndodheshin në institucionin ku ndodhi tragjedia’, ka shkruar ministri Sveçla, duke shtuar se zëvendësministrin Yenin e ka takuar në darkën e ministerialit që është mbajtur para disa muajsh në Pragë.
“Përgjatë bisedës me të kam kuptuar se Ukraina e sulmuar padrejtësisht e pa arsye nga Rusia, ka triumfuar deri më tash falë profesionalizmit, përkushtimit dhe atdhedashurisë për vendin si të z. Yenin dhe bashkëpunëtorëve të tij”, ka shkruar ai.
“Ndajmë dhimbjen në këtë humbje të madhe me familjarët e të vdekurve dhe gjithë popullin ukrainas ndërsa të lënduarve ju urojmë shërim sa më të shpejtë. Ndonëse tragjedi dhe humbje të tilla rëndojnë mbi Ukrainën, ajo do të dalë fitimtare përballë Rusisë agresore”, përfundon ministri Sveçla.
