Deputeti nga radhët e LDK-së, Avdullah Hoti, ka kritikuar sërish qasjen e kryeministrit Albin Kurti në Davos të Zvicrës, ku po merr pjesë në Forumin Ekonomik Botëror.
Ai ka thënë se thirrjet e Kurtit për investitorë dhe paralajmërimet për konflikt “nuk shkojnë bashkë”.
“Shkon në Davos dhe e organizon një minikonferencë për investime, për të cilën e paguan një kompani konsulente 58,341.19 franga zvicerane pa asnjë procedurë prokurimi. Por, në dhomën tjetër, kërkon nja 70 trupa më shumë të KFOR-it nga Finlanda, edhe pse KFOR-i e rrit dhe e zvogëlon numrin e ushtarëve brenda natës sipas nevojës që ka”, ka shkruar Hoti në Facebook të mërkurën.
“Çfarë mesazhe janë këto dhe çfarë promovimi i investimeve është ky?! Kush po e këshillon kështu?! Kah na shpie kjo qasje në fushën e politikës dhe të ekonomisë?!” ka përfunduar ai.
Ndërkaq Serbia prej kohësh ka përdorë kërcënime të shumta karshi Kosovës, duke e ngritë ë gatishmëri edhe ushtrinë e saj dhe bërë kërkesa për kthimin e ushtarëve serbë në Kosovë.
Serbia kohën e fundit ka nxitur edhe grupe kriminale në veri që të ngrisin barrikada ne veri të vendit, si kundërshtim për vendimet e Qeverisë së Kosovës që të shtrijë autoritetin e saj në gjithë vendin dhe të largojë nga qarkullimi targat ilegale që nga koha e Millosheviqit.
