Qytetarë të shumtë kanë shkuar të dielën në Reçak të Shtimes për të kryer homazhe në nder të 45 martirëve në masakrën e kryer në këtë vend para 24-vjetësh.
Familjarët e viktimave janë parë me kurora lulesh në duar në shënimin e përvjetorit të kësaj ngjarjeje.
Tashmë homazhe kanë bërë edhe Presidentja Vjosa Osmani, kryeministri Albin Kurti dhe kryekuvendari Glauk Konjufca.
Bashkë me ta për të bërë homazhe ishte edhe ambasadori William Walker.
Homazhe në kompleksin memorial në Reçak gjatë paradites të së dielës ka bërë homazhe edhe ministri i Mbrojtjes, Armend Mehaj, bashkë me zëvendësministrin, Shemsi Syla dhe drejtues të FSK-së kanë vendosur kurora lulesh.
Më 15 janar 1999, në fshatin Reçak u vranë e u masakruan barbarisht 45 shqiptarë të paarmatosur.
Në orët e hershme të mëngjesit të 15 janarit Reçaku u zgjua i rrethuar. Sipas dëshmitarëve, aty rreth orës 6:30 forcat serbe me artileri të rëndë kanë filluar të bombardojnë fshatin. Pas ndërprerjes së bombardimeve, forcat serbe janë futur në fshat dhe kanë filluar bastisjet.
