Për disa njerëz, të dallosh të majtën nga e djathta është po aq e lehtë sa të bësh dallimin lart-poshtë, por një pakicë e konsiderueshme, rreth një në gjashtë persona, sipas një studimi të fundit, luftojnë me dallimin.
Edhe për ata që besojnë se nuk kanë probleme, shpërqendrimet si zhurma e ambientit, mund të pengojnë të bëjnë zgjedhjen e saktë.
“Askush nuk e ka të vështirë të thotë përpara dhe mbrapa, ose lart dhe poshtë. Është për shkak të simetrisë”, thotë Ineke van der Ham, profesoreshë e Neuropsikologjisë në Universitetin Leiden në Holandë.
Por të dallosh të majtën nga e djathta është ndryshe, thotë ajo.
Dallimi majtas-djathtas është në fakt një proces mjaft kompleks, që kërkon kujtesën, gjuhën, përpunimin vizual e hapësinor. Në fakt, studiuesit sapo kanë filluar të kuptojnë saktësisht se çfarë po ndodh në trurin tonë kur ne e bëjmë atë, dhe pse është shumë më e lehtë për disa njerëz sesa të tjerët.
“Disa individë mund të dallojnë të djathtën nga e majta në mënyrë të lindur, thjesht mund ta bëjnë këtë pa menduar., thotë Gerard Gormley, një mjek i përgjithshëm dhe profesor klinik në Universitetin Queen’s Belfast në Irlandën e Veriut.
Në një përpjekje për të kuptuar se çfarë ndodh, Gormley dhe kolegët e tij kanë kryer kërkime mbi përvojën e studentëve të Mjekësisë për marrjen e vendimeve majtas-djathtas dhe kanë ekzaminuar procesin.
Hulumtimi i publikuar nga Van der Ham dhe kolegët e saj në 2020 zbuloi se rreth 15% e njerëzve e vlerësojnë veten si pamjaftueshmërisht të aftë kur bëhet fjalë për identifikimin e majtas-djathtas. Pothuajse gjysma e 400 pjesëmarrësve në studim thanë se përdorën një strategji të lidhur me dorën për të identifikuar se cila është ajo.
