Në departamentin special të Gjykatës së Prishtinës sot është marrë vendimi për të pandehurit që akuzoheshin për sulm në Kuvendin të Kosovës, sulmi kishte ndodhur në gusht të vitit 2016.
Për këtë rast të akuzuar për shumë vite kanë qenë ish-aktivisti i lëvizjes Vetëvendosje Frashër Krasniqi, mandej Adea Batusha, Egzon Haliti dhe Atdhe Arifi.
E sot Gjykata Themelore në Prishtinë ka shpallur aktgjykim lirues ndaj të akuzuarve Frashër Krasniqi, Adea Batusha, Egzon Haliti dhe Atdhe Arifi, lidhur me akuzën për terrorizëm.
Sipas aktgjykimit, të ndjekurit lirohen nga aktakuza, pasi nuk është vërtetuar se të njëjtit kanë kryer veprën penale që iu vihej në barrë.
Aktgjykimi ndaj të akuzuarve u shpall të martën, nga kryetari i trupit gjykues Vesel Ismaili.
Shpenzimet procedurale bien në barrë të gjykatës.
Këtë rast, fillimisht e kishte gjykuar gjykatësi Beqir Kalludra, por pas avancimit të tij në Gjykatën e Apelit me vendimin e 21 dhjetorit 2020, të Këshillit Gjyqësor të Kosovës (KGJK), lënda ka kaluar tek gjykatësi Kushtrim Shyti, e më pas përfundimisht këtë lëndë e gjykoi gjykatësi i Departamentit Special, Vesel Ismaili.
Gjykata e shkallës së parë me 27 nëntor të vitit 2017 kishte marrë aktgjykim dënues kundër të pandehurve Atdhe Arifit, Frashër Krasniqi, Egzon Haliti dhe Adea Batusha.
Gjykata kishte dënuar Atdhe Arifin me 6 vjet dënim me burgim. Frashër Krasniqin e kishte dënuar me 8 vjet dënim me burgim, Egzon Halitin me 5 vjet e gjysmë burg dhe Adea Batushën me 2 vjet dënim me burgim.Arifi, Krasniqi, Haliti dhe Batusha po akuzohen nga Prokuroria Speciale në Prishtinë për sulmin me mjet shpërthyes kundër Kuvendit të Kosovës që ka ndodhur në mbrëmjen e 4 gushtit të vitit 2016.
Lidhur me sulmin në Kuvendin e Kosovës, përpos të akuzuarve të tanishëm, të akuzuar ishin edhe Petrit Ademi, ndaj të cilit pushuan hetimet, si dhe Astrit Dehari i cili vdiq në Qendrën e Paraburgimit në Prizren, në rrethana ende të paqarta.
