Të akuzuarit, në rastin e sekuestrimit të 400 kilogramëve kokainë e cila ishte vendosur në mish të ngrirë e që kishte ardhur nga Brazili në Kosovë, Izet Sheqiri, Faton Vrajolli, Kadri Brahimi, Kadri Sheqiri dhe Fehmi Bytyqi, janë deklaruar të pafajshëm.
Këto deklarime i kanë bërë në seancën e shqyrtimit fillestar, pas leximit të aktakuzës nga prokurori special, Valdet Gashi.
I akuzuari Izet Sheqiri deklaroi se nuk ndihet fajtor për asnjë pikë të aktakuzës. “Jo nuk ndihem fajtor për asnjë hiq”, ka thënë Sheqiri.
I pafajshëm për të gjitha pikat e aktakuzës është deklaruar edhe i akuzuari Faton Vrajolli. “Në të gjitha pikat e aktakuzës ndihem i pafajshëm”, kadeklaruar Vrajolli.
Po ashtu edhe Kadri Brahimi ka theksuar se ndihet i pafajshëm për veprat penale që e ngarkon prokuroria speciale. “Për pikat që i ka lexu prokurori nuk ndihna fajtor”, ka theksuar Brahimi.
Të pafajshëm janë deklaruar edhe Kadri Sheqiri e Fehmi Bytyqi.
Pas deklarimit lidhur me pafajësinë e tyre gjykatësi, Musa Konxheli njoftoi të akuzuarit se kanë afat 30 ditë për të paraqitur kërkesë për hudhje të aktakuzës dhe kundërshtim të provave.
Gjatë seancës gjyqësore mbrojtësit e të akuzuarve kanë kërkuar që seanca gjyqësore lidhur me kërkesën për ndërrimin e masës së paraburgimit, të mbyllet për publikun dhe mediat, pasi sipas tyre aty do të shtjellohen çështje biznesore dhe familjare pa interes për publikun.
Një kërkesë e tillë u refuzuar nga gjykatësi Konxheli me arsyetimin se nuk janë në fazën e shqyrtimit të masës së paraburgimit, por që janë në fazën fillestare të kësaj çështje penale juridike.
Pas refuzimit për mbylljen e seancës, mbrojtësi i të akuzuarit Izet Sheqiri, avokati Besnik Berisha ka deklaruar se tërhiqen nga kërkesa për ndërrimin e masës së paraburgimit për klientin e tij, me arsyen se nuk mund t’i paraqes shkaqet e ndërrimit të masës në një seancë të tillë publike.
Ndërkaq, mbrojtësja e të akuzuarit Faton Vrajolli, avokatja Teuta Xhema, ka thënë se qëndrojë prapa kërkesës për ndërrimin e masës së paraburgimit, duke shtuar se kanë pushuar arsyet që klienti i saj të qëndrojë në paraburgim tashmë gati 19 muaj, duke dorëzuar edhe parashtresë lidhur më këtë çështje.
Tutje edhe mbrojtësi i të akuzuarit Kadri Brahimi, avokati Shefqet Hasimi, ka theksuar se masa e paraburgimit për klientin e tij është e rëndë marrë parasysh se ky ka qenë vetëm vozitësi i kamionit më mall, duke mos ditur se çfarë ka brenda tij.
Po ashtu edhe mbrojtësja e të akuzuarit Fehmi Bytyqi, avokatja Hydije Ademi , ka thënë se kanë pushuar arsyet që klienti i saj të qëndrojë ende në paraburgim, gjithashtu e njëjta dorëzoi edhe një shkresë për gjykatën lidhur me deklarimin e pafajësisë dhe masën e paraburgimit.
Lidhur me kërkesat e avokatëve Xhema, Hasimi dhe Ademi gjykatësi Koxheli refuzoi kërkesat për ndërrimin e masës së paraburgimit me një masë tjetër më të butë, me arsyen se ende nuk kanë pushuar shkaqet për qëndrimin e tyre në paraburgim.
Ndërkaq, i akuzuari Kadri Sheqiri aktualisht ka masën e lajmërimit në stacionin policor.
Paraprakisht, gjykatësi Konxheli ka sqaruar se është bërë veçimi i procedurës ndaj të akuzuarit, Hyzri Sheqiri me arsyen se mbrojtësi i tij, avokati Artan Qerkini ka deponuar marrëveshje për pranimin e fajësisë e lidhur mes të akuzuarit Sheqiri dhe prokurorisë special.
Po ashtu gjykatësi Konxhel shtoi se edhe për të akuzuarin Naim Morina është bërë veçimi i procedurës në seancën e kaluar, pasi që i njëjti ka arritur marrëveshje për pranimin e fajësisë.
Sipas aktakuzës së Prokurorisë Speciale të Republikës së Kosovës (PSRK), për rastin e sekuestrimit të 400 kilogramëve kokainë, të akuzuar janë pronari i kompanisë “MC FOOD”, Izet Sheqiri, dhe gjashtë të tjerë, Faton Vrajolli, Kadri Sheqiri, Kadri Rrahimi, Fehmi Bytyqi, Hyzri Sheqiri dhe Naim Morina.
