Policia e Kosovës ka arrestuar një person në Ferizaj të dielën, me dyshimin se ka kryer veprën penale “shpërdorim i pasurisë së huaj”.
Në njoftim u tha se i dyshuari me inicialet L.Q., 23-vjeçar, kishte marrë në shërbim veturën e E.J., 22-vjeçar dhe e kishte shitur atë në Lipjan.
Sipas Policisë, i dyshuari është shoqëruar në stacionin policor dhe pas intervistimit nga policët hetues, është ndaluar për 48 orë.
Vetura i është kthyer pronarit, ndërsa një person tjetër i dyshuar për shitjen e një veture tjetër të të njëjtit pronar, është në kërkim.
Njoftimi i plotë nga Policia e Kosovës:
Arrestohet një person për shpërdorim të pasurisë së huaj në Ferizaj
Me datën 18.12.2022 rreth orës 19:20 policia e stacionit në Ferizaj ka pranuar një informacion se në rrugën ‘’Sali Çeku’’ në Ferizaj është një rast i shpërdorimit të pasurisë së huaj.
Në lidhje me këtë policët e stacionit në Ferizaj, nën autorizim të prokurorit kujdestar nga Prokuroria Themelore në Ferizaj, i kanë marrë veprimet e nevojshme dhe menjëherë kanë dalë në vendin e ngjarjes dhe i kanë nisur hetimet . Nga hetimet e para, sipas ankuesit, dy të dyshuar i kanë marrë dy automjete në shërbim dhe nuk ishin lajmëruar më.
Policët hetues, pas një pune intensive hetimore, grumbullimit të informacioneve në terren, kanë arrestuar personin L.Q ( M/K) i moshës 23 vjeçar, i cili pasi kishte marrë në shërbim një veturë nga personi E.J ( M/K) i moshës 22 vjeçar, e kishte shitur atë në qytetin e Lipjanit një personit tjetër.
I dyshuari i parë L.Q është shoqëruar në stacionin e policisë në Ferizaj dhe pas intervistimit nga policët hetues, me vendim të prokurorit të rastit, është ndaluar në mbajtje për 48 orë për procedura të mëtejme. Rasti është cilësuar ” Shpërdorimi i pasurisë së huaj’’, ndërsa vetura i është kthyer pronarit.
Në kërkim policor mbetet edhe një person tjetër për shpërdorim të pasurisë së huaj për një automjet tjetër ndaj të njëjtit pronar.
