Aplikimi i Kosovës për anëtarësim në BE, vjen përkrahja e parë nga një shtet i Evropës

Estonia ka premtuar përkrahje për Kosovën në rrugën drejt anëtarësimit në Bashkimin Evropian (BE).

Ministri i Jashtëm i Estonisë, Urmas Reinsalu, ka shkruar në Twitter pas aplikimit të Kosovës për statusin e shtetit kandidat për anëtarësim në BE.

“Estonia qëndron e gatshme për ta përkrahur Kosovën në rrugën e saj drejt Bashkimit Evropian”, ka shkruar Reinsalu.

#Kosovo?? has delivered application for #EU?? membership.
Estonia?? stands ready to support Kosovo on its path to the European Union.

— Urmas Reinsalu (@UrmasReinsalu) December 15, 2022

Kryeministri i Kosovës, Albin Kurti, e ka dorëzuar aplikimin në Republikën Çeke – vendin që aktualisht kryeson Presidencën e BE-së.

Ceremonia është mbajtur në ndërtesën e Qeverisë çeke në Pragë, ndërsa aplikimin Kurti ia ka dorëzuar ministrit për Çështje Evropiane të Çekisë, Mikulash Bek.

Kurti e ka quajtur ditë historike për Kosovën të enjten kur në Pragë ka dorëzuar aplikimin për statusin e shtetit kandidat në BE.

“Kjo është ditë historike për popullin e Kosovës dhe ditë e jashtëzakonshme për demokracinë në Evropë. Letra që kam sjellë bartë shpresat dhe ëndrrat e qytetarëve tanë. Flet për aspiratat tona për t’iu bashkuar BE-së. I përgjigjet vizionit të Evropës që është e përgjithshme e plotë dhe në paqe dhe një Evropë që ka të ardhme të ndritur”.

Kurti ka shtuar se Kosova e kupton detyrën e saj dhe se me meritat e veta i duhet të shkojë përpara.

Një ditë më herët, udhëheqësit e Kosovës, përfshirë kryeministrin Kurti, presidenten Vjosa Osmani dhe kryetarin e Kuvendit, Glauk Konjufca, e nënshkruan aplikimin në Prishtinë, duke e cilësuar këtë si “hap historik” për Kosovën.