Më një fjali të vetme i ka reaguar ministrja e Punëve të Jashtme, Donik Gërvalla, deputetes së PDK-së, Ganimete Musliu, e cila përdori gjuhë seksiste ndaj presidentes së vendit Vjosa Osmani.
Deputetja nga radhët e PDK-së, Ganimete Musliu është marrë sot me pamjen fizike të kreut të vendit, pasi presidentja Vjosa Osmani kreu fjalimin e saj po sot në Kuvendin e Kosovës.
Osmani gjatë fjalimit të saj tha se “nuk do të zmbrapsem edhe atëherë kur më sulmoni me pamjen time”
Ndaj kësaj deklarate ka reaguar deputetja Musliu e cila ka përdorur gjuhë të ashpër në drejtim të presidentes.
“Si presidente ti do të mbahesh në mend veç si inatçore, kompleksgjike, përçarëse dhe urrejtëse deri në palcë! Meqë paske hyrë të kg. Po ta them troç: Do të mbahesh në mend si një GRUA që hyri në Presidencë me 100 kg e do të dalë nga aty me 50 kg”, ka shkruar Musliu.
Kjo që shkroi Musliu ka nxitur reagime të shumta. Por, reagimi i ministres Donika Gervalla është më i veçantë.
“Kur marrja bëhet fytyrë!”, kjo është fjalia e vetme që shkroi sot si reagimin ministrja Gërvalla ndaj gjithë asaj që deklaroi deputetja Musliu.
E skandaloze e të papranueshme e ka quajtur deklaratën e Ganimete Musliut edhe ministrja e Drejtësisë, Albulena Haxhiu, e cila ka kërkuar nga PDK-ja që të distancohet nga gjuha e tillë seksiste.
Haxhiu ka thënë se gjuha e deputetes së PDK-së, Ganimete Musliu ndaj presidentes Vjosa Osmani është manifestim i urrejtjes që shndërrohet në gjuhë seksiste nga dikush që në rrethana normale do të duhej ta luftonte atë.
“Kjo gjuhë është manifestim i mendimit, ndërkohë që pas saj ngelet vetëm veprimi… Gjuha e sotme e Ganimete Musliut, që nuk është e para herë, është skandaloze, e papranueshme dhe nga e cila do të duhej të distancoheshin të gjithë duke nisur nga partia e saj. Aq më e rëndë kur kjo bëhet nga dikush që mbahet për përfaqësues dhe ka përgjegjësi publike”, ka shkruar Haxhiu në Facebook.
