Udhëheqësit e Kosovës nënshkruan më 14 dhjetor aplikimin për anëtarësim në Bashkimin Evropian. Ky aplikim pritet të dorëzohet më 15 dhjetor në Republikën Çeke – vendin që aktualisht kryeson Presidencën e BE-së.
Por anëtarësimi në BE nuk vjen brenda natës. Është proces kompleks që zgjat me vite.
Të drejtë për aplikim ka secili vend evropian, që ka demokraci të qëndrueshme dhe ekonomi funksionale të tregut. Nuk ka asnjë garanci se ai do ta fitojë ulësen në BE.
Pas aplikimit për anëtarësim, janë tre hapa kryesorë: Statusi i kandidatit, Negociatat e anëtarësimit dhe Ratifikimi i traktatit.
Statusi i kandidatit nënkupton pranimin formal të aplikimit të një vendi. Ky status jepet me vendim unanim të Këshillit Evropian. Nga koha e aplikimit deri te statusi i vendit kandidat mund të duhen disa vite kohë. Në rastin e Shqipërisë kanë kaluar pesë vjet.
Negociatat e anëtarësimit janë hapi i dytë. Ato nisin vetëm pasi vendi kandidat përmbush mjaftueshëm kriteret politike dhe kjo mund të marrë disa vite kohë, raporton rel.
Negociatat fokusohen në përshtatjen e ligjeve të vendit kandidat me ligjet e BE-së. Ato përfshijnë 35 kapituj dhe janë faza më e gjatë në procesin e anëtarësimit në BE. Mali i Zi ka dhjetë vjet që ka nisur negociatat.
Pasi 35 kapitujt të mbyllen unanimisht, BE-ja dhe vendi kandidat nënshkruajnë Traktatin e pranimit. Ai më pas duhet të ratifikohte nga vendi kandidat dhe secili vend i BE-së. Në fund caktohet data zyrtare e anëtarësimit, kur vendi bëeht anëtar me të drejta të barabarta i BE-së.
Kroacia është e fundit që i është bashkuar BE-së në vitin 2013 – dhjetë vjet pas aplikimit.
Sot janë tetë vende kandidate për anëtarësim në BE: Shqipëria, Mali i Zi, Serbia, Maqedonia e Veriut, Bosnjë e Hercegovina, Turqia, Ukraina dhe Moldavia.
Kosova është në një pozitë unike, pasi pesë nga 27 vendet anëtare të BE-së nuk e njohin pavarësinë e saj.
Marrë parasysh se shumë vendime kërkojnë mbështetje unanime në BE, gjasat janë që Kosova të mbetet në vendnumërim derisa shtetet mosnjohëse nuk ndryshojnë qëndrim.
