Emisari i Bashkimit Evropian për dialogun Kosovë-Serbi, Miroslav Lajçak dje ka kërkuar një zgjidhje politike për zhbllokimin e barrikadave të vendosura në veri të vendit.
E këtë gjë e ka përsëritur përmes një postimi edhe sot në orët e para të së mërkurës.
“Vizitova sot Kosovën për të diskutuar hapat e ardhshëm të dialogut me kryeministrin Albin Kurti dhe zëvendëskryeministrin Besnik Bislimi”, njoftoi emisari evropian. Bashkë me zëvendësndihmës Sekretarin Escobar ne diskutuam edhe për situatën mjaft shqetësuese në veri të Kosovës. Na nevojitet urgjentisht një zgjidhje politike për rikthimin e lëvizjes së lirshme për të gjithë!”, ka shkruar Lajçak.
Lajçaku ka qëndruar në Kosovë edhe javën e shkuar, për të sjellë atë që po cilësohet version i ri i planit “evropian” për marrëveshjen Kosovë-Serbi.
Ndërkaq që nga 6 dhjetori, në veri të Kosovës janë shënuar një sërë incidentesh të armatosura, që kanë kulmuar me vendosjen e barrikadave pasditen e 10 dhjetorit.
Disa serbë lokalë nën nxitjen e Beogradit zyrtar nisën ngritjen e barrikadave në veri në shenjë pakënaqësie ndaj arrestimit të një ish-pjesëtari të Policisë së Kosovës.
Autoritetet në Kosovë thanë se ish-polici, Dejan Pantiq, dyshohet se ka organizuar “sulmin terrorist” ndaj zyrave të KQZ-së në veri.
Ndaj tij u caktua një muaj paraburgim më 12 dhjetor.
Komuniteti ndërkombëtar ka kërkuar që të largohen barrikadat dhe i ka dënuar sulmet ndaj Policisë së Kosovës dhe misionit të BE-së në Kosovë për sundim të ligjit, EULEX.
Visited Kosovo today to discuss next steps in the Dialogue with PM @albinkurti & DPM @BislimiBesnik. Together with DAS Escobar, we also spoke about the very concerning situation in north Kosovo. We urgently need a political solution to help restoring freedom of movement for all! pic.twitter.com/VSlW8XPqcL
— Miroslav Lajčák (@MiroslavLajcak) December 13, 2022
