Zëvendëskryeministri i vendit, Besnik Bislimi ka udhëtuar dje drejt Brukselit.
Sipas njoftimit nga Qeveria, zëvendëskryeministri i parë përgjegjës për Integrim Evropian, Zhvillim e Dialog, ka shkuar në Bruksel për informim e koordinim sa i përket aplikimit të Kosovës për anëtarësim në BE.
Takimet do t’i ketë në Këshill, Parlament e Komision Evropian.
Bislimi do të pritet në një takim nga Komisioneri i Bashkimit Evropian për Fqinjësi dhe Zgjerim, Oliver Varhelyi, njofton Klankosova.tv.
Po ashtu, zëvendëskryeministrit do të takohet edhe me zëvendëspresidenten e Komisionit Evropian, Vera Jourova.
Bislimi ka takuar dje në Bruksel, Simon Mordue, këshilltar kryesor për Politika të Jashtme i Presidentit të Këshillit Evropian, Charles Michel.
Zëvendëskryeminitri Bislimi e ka njoftuar këshilltarin e presidentit të Këshillit Evropian me vendimin e shtetit të Kosovës për aplikim në BE.
“Në këtë takim, këshilltari i Presidentit Charles Michel, u informua mbi vendimin e Kosovës për aplikimin për anëtarësim në Bashkimin Evropian. Kosova gjendet tashmë në vitin e gjashtë të zbatimit të Marrëveshjes së Stabilizim Asociimit”, thuhet në njoftimin e Kryeministrisë.
Tutje aty thuhet se ka ardhur koha që marrëdhëniet dhe partneriteti me Bashkimin Evropian të shkojë një hap tutje.
“Kosova ka shënuar progres të theksuar, në fusha kyçe në bashkërendimin dhe përafrimin e standarteve me ato të BE-së si në sundim të ligjit, luftën kundër krimit të organizuar dhe korrupsionit, zhvillimin ekonomik e demokratizimin. Progres ky, i riafirmuar edhe nga Raporti për vendin 2022 i Komisionit Evropian./KosovaNews
