Bashkimi Evropian ka draftuar një propozim për normalizim raportesh në mes të Kosovës dhe Serbisë, me një afat të qartë të veprimeve, sipas një diplomati të lartë të BE-së, që ka folur për agjencinë e lajmeve “Reuters” në margjina të Samitit BE-Ballkani Perëndimor të mbajtur të martën në Tiranë. Draftpropozimi, sipas diplomatit, shpalos pritjet që palët të arrijnë marrëveshje finale për më pak se një vit.
“Ka shumë gjëra që e bëjnë këtë hap të madh para sa i përket situatës aktuale… s’është njohje e plotë… por normalizim i plotë i marrëdhënieve”, ka thënë diplomati në kushte anonimiteti.
Siç shkruan “Reuters”, marrëveshja finale me Kosovën mbetet parakusht për Serbinë që t’i bashkohet BE-së.
“Pasi kemi dëgjuar dy palët, kemi ridraftuar propozimin”, ka thënë diplomati.
Propozimi përmban edhe një aneks “me kalendar të qartë veprimesh – kur dhe si duhet të bëhen gjërat”, ka thënë diplomati.
Diplomati ka thënë se Kosova dhe Serbia “duhet të vazhdojnë angazhimin konstruktiv e të fokusohen në progres të pakthyeshëm drejt normalizimit”.
Shefi i politikës së jashtme i BE-së, Josep Borrell, ka konfirmuar në këtë samit se Kosovës dhe Serbisë u është dorëzuar drafti i ri i propozimit, bazuar në planin e njohur si “franko-gjerman”.
