Sali Berisha ka mbetur i lënduar në fytyrë pasi u godit me grusht nga një person gjatë protestës së opozitës. Pavarësisht plagëve në mollëza dhe hundë, Berisha nuk u largua dhe vijoi të mbante fjalimin e tij.
Në fotot e publikuara më pas duket se kryetari i Partisë Demokratike ka një fryrje në mollëzën e djathtë, ku edhe u godit.
Pas incidentit lideri demokrat iu drejtua protestuesve me një mesazh në podium, ku theksoi se asgjë në botë nuk e mposht popullin opozitar.
“Asgjë në botë nuk na mposht ne popullin opozitar. Poshtë kriminelët! Ne do të triumfojmë! Rroftë opozita shqiptare! Jemi bashkë për të protestuar kundër regjimit të horrave e kriminelëve”, u shpreh Berisha.
Sipas informacioneve të para mediat raportojnë se dyshohet që personi është me probleme të shëndetit mendor. Ai është identifikuar si Gert Shehu, 31 vjeç, banues në Tiranë dhe me origjinë nga Tepelena.
Pas goditjeve të marra nga truprojat e Berishës, Shehu është transportuar në spitalin e Traumës.
Mësohet se ai iu afrua turmës me vrap dhe goditi edhe disa operatorë të mediave për t’i hapur rrugën para se të mbërrinte para kryetarit të PD, duke e goditur në fytyrë.
Personi në fjalë e ka goditur me grusht kryetarin e Partisë Demokratike, Sali Berisha, teksa ai dhe protestuesit po shkonin në Bulevardin “Dëshmorët e Kombit”. Personi është izoluar dhe rrahur nga truprojat dhe mbështetës të tjerë të opozitës.
