Kryetari i Këshillit Kombëtar Shqiptar në Luginë, Ragmi Mustafi, me rastin e festës së 28 Nëntorit, ka ngritur flamurin kombëtar në ndërtesën e këtij Këshilli në Preshevë.
Me këtë rast Mustafi ka theksuar se do të vazhdojnë betejën politike dhe juridike për legalizimin e simboleve kombëtare shqiptare në Luginë.
“Edhe sot si katër vite radhazi, nga pozita e kryetarit të këtij institucioni, vendosëm të valojë flamurin kombëtar në Këshillin Kombëtar Shqiptar. Për nderë të sakrificës së shqiptarëve në Preshevë, Bujanoc dhe Medvegjë. Pavarësisht, përndjekjes së autoriteteve serbe e ndalimit me ligj. Nuk është zgjidhje vendosja e flamurit kombëtar krahas atij serb për një ditë si kompromis në heshtje i mos zhvillimit të procedurave të kundërvajtjes. E as vendosja, vetëm flamurit kombëtar për një ditë të vetme”, ka shkruar Mustafi në Facebook.
Sipas tij vetë ndalimi me ligj i flamurit kombëtar shqiptar, është njollosje e tij nga shteti i Serbisë. “Nuk i takon shtetit t’i përzgjedhë veçoritë identitare të bashkësive të ndryshme etnike/kombëtare”, ka shkruar ai.
Ai ka thënë se ligjet diskriminuese duhet të ndryshohen.
“Këshilli Kombëtar Shqiptar do ta vazhdojë betejën politike dhe juridike për legalizimin e simboleve kombëtare shqiptare. Simbolet tona. Pa ndryshime. Pa dallime. Simbolet kombëtare nuk duhen ndryshuar! Janë ligjet diskriminuese ato që duhen ndryshuar! Flamuri kombëtar shqiptar do të valojë në Luginën e Preshevës! Gjithnjë, gjithmonë, përgjithmonë! Urime 28 nëntori – Dita e Flamurit”, ka shkruar Mustafi..
