Kanë filluar ceremonitë festive shtetërore për nder të Ditës së Flamurit.
Zëvendëskryeministri Besnik Bislimi dhe pjesëtarë të kabinetit qeveritar së bashku me deputetë, bënë homazhe pranë përmendores së heroit kombëtar, Gjergj Kastrioti-Skënderbeu.
Bazuar në agjendën shtetërore, në orën 10:00, do të bëhen homazhe edhe në kompleksin përkujtimor “Adem Jashari” në Prekaz.
Qeveria e Kosovës ka bërë të ditur se dita nis me homazhe te busti i heroit kombëtar Gjergj Kastrioti-Skënderbeu dhe përfundon me pritjen e kryeministrit Albin Kurti, e cila është paraparë të mbahet në orën 19:00.
Për nderë të 28 nëntorit, ndërtesa e Kuvendit të Kosovës mbrëmë mori ngjyrat e flamurit kombëtar.
Përveç Qeverisë së Kosovës, aktivitete të ndryshme ka organizuar edhe Komuna e Prishtinës.
Aktivitetet e organizuara nga Komuna e Prishtinës nisin në orën 11:00 me përurimin e shtatores së Prof. Anton Çettës dhe përfundojnë në orën 19:00 me koncertin për 35 vjetorin e tifozërisë së kryeqytetit, Plisat me “Besa Besë”.
