Gjykata Themelore në Prishtinë ka refuzuar padinë për shpifje të ish-ministrit të transportit dhe telekomunikacionit Pal Lekaj ndaj zëvendësministrit të tanishëm të po kësaj ministrie Hysen Durmishi.
Më datë 30.07.2021, Pal Lekaj kishte paraqitur padi me pretendimin që ndaj tij është shpifur nga zëvendësministri Hysen Durmishi ku në një emision televiziv e kishte quajtur ish ministrin Lekaj dhe bashkëpunëtoret e tij si “grup Kriminal”
“Sot e dorëzova padinë kundër fyerjeve dhe shpifjeve të zëvendësministrit të MMPHI-së, H. Durmishit, i cili në një emision televiziv më quajti mua dhe bashkëpunëtorët e mi gjatë mandatit tim si ministër, si një ‘grup kriminal’, kishte deklaruar Pal Lekaj në ditën që e paraqiti padinë pranë Gjykatës Themelore në Prishtinë.
Përmes kësaj padie, Lekaj kishte kërkuar nga Gjykata caktimin e masës së sigurisë, si dhe dëmshpërblim prej 20 mijë eurove nga Hysen Durmishi.
KosovaNews ka siguruar aktvendimin e Gjykatës Themelore në Prishtinë në të cilin thuhet se “Pas shqyrtimit të provave dhe materialeve marrjes në pyetje të palëve Gjykatë Themelore në Prishtinë, më datë 13.06.2022, e ka refuzuar si të pabazuar padinë e ish-ministrit Lekaj”.
Zëvendësministri Durmishi në një përgjigje me shkrim të deponuar në gjykatë me datë 07.10.2021 e kishte kundërshtuar në tërësi propozimin për caktimin e masës së sigurisë. Të njëjtin e ka kundërshtuar edhe në aspektin e cenimit të lirisë së shprehjes e garantuar edhe me akte ndërkombëtare dhe me kushtetutën e vendit. Në seancën dëgjimore përfaqësuesi i Durmishit në këtë seancë ka thënë se zëvendësministri në emisionin në fjalë ka shpjeguar gjëra për të cilat tashmë Prokuroria Speciale e Kosovës saktësisht më 4 shkurt të këtij viti ka publikuar aktakuzën ndaj Pal Lekajt dhe të tjerëve për keqpërdorimet që kanë ndodhur në ministrinë në fjalë./KosovaNews/
