Stacionet policore në veri të Kosovës po funksionojnë me numër të reduktuar të policëve, që nga vendimi i serbëve të veriut për t’u larguar nga institucionet e Kosovës, e të cilit i janë bashkuar edhe policët. Në këto stacione, në shërbim janë vetëm 8 policë shqiptarë e boshnjakë. Si rrjedhojë e mungesës së stafit, në Policinë e Kosovës kanë thënë se do të bëjnë shtimin e numrit të zyrtarëve policorë. Teksa në misionin e BE-së për sundim të ligjit kanë konfirmuar se u është drejtuar kërkesë zyrtare për ta bërë patrullimin me policë të tij
Dorëheqjet e policëve serbë kanë shkaktuar reduktimin e stafit policor në veri. Në stacionet policore, që para vendimit të së shtunës së kaluar për largim të serbëve të veriut nga institucionet e Kosovës numëronin nga dhjetëra zyrtarë policorë për ndërresë, tani janë nga 8 sosh. Të gjithë policët janë shqiptarë e boshnjakë.
Tkurrja e stafit, ka shtyrë policinë në këtë pjesë që t’u përgjigjet vetëm rasteve emergjente.
Në Policinë e Kosovës, ndërkaq, kanë thënë se karshi kësaj situate do të bëhet shtimi i numrit të zyrtarëve policorë.
“Referuar kërkesës suaj, ju lutem t’u referoheni njoftimeve zyrtare të PK-së, ku janë dhënë sqarimet/njoftimet lidhur me paraqitjet e dorëheqjeve të punonjësve policorë të komunitetit serb në pjesën e veriut të vendit, në zonën e Drejtorisë Rajonale të Mitrovicës Veri. Po ashtu, janë dhënë njoftimet se pas dorëheqjeve në mungesë të personelit dhe kapaciteteve të mjaftueshme policore në veri, do të rriten gradualisht kapacitetet policore me zyrtarë të rendit publik, në numër të mjaftueshëm, duke u bazuar në nevojat dhe vlerësimet operacionale.
Gjithashtu është bërë e ditur se PK-ja ka kapacitete të mjaftueshme policore dhe se veprimet e tyre do t’i ndërmerr konform autorizimeve ligjore dhe kushtetuese, me qëllim të ofrimit të sigurisë dhe shërbimit ndaj qytetarëve në të gjitha rastet që paraqiten. Ruajtja e rendit dhe qetësisë publike, mbikëqyrja dhe kontrolli kufitar, parandalimi i krimit, si dhe ofrimi i shërbimeve policore ndaj të gjithë qytetarëve pa dallime mbetet qëllimi kryesor i PK-së”, thuhet në përgjigjen e Policisë për kohën.
Në misionin e BE-së për sundim të ligjit, EULEX, kanë konfirmuar se u është drejtuar kërkesë zyrtare për ta vazhduar patrullimin vëzhgues në veri me policë të tij.
“Si përgjigje ndaj nevojës së EULEX-it për forca shtesë në terren e për mbështetje më të madhe të homologëve të Kosovës, nëse kërkohet e nëse është e nevojshme, misioni ka dërguar një Njësi Rezervë Policore me 23 xhandarë, karabinierë italianë. Për më shumë, Policia e Kosovë ia ka dërguar një shkresë EULEX-it të dielën lidhur me vazhdimin e patrullave vëzhguese dhe monitorimin e situatës në Kosovën veriore”, është thënë në përgjigjen e EULEX-it.
Angazhimi i tyre për vëzhgimin e situatës së sigurisë dhe për këshillimin e Policisë së Kosovës, sipas EULEX-it, është shtuar shkaku i rrethanave të krijuara nga dorëheqjet e policëve.
“Njësia Policore e EULEX-it, e përbërë prej 105 zyrtarëve policorë polakë, i ka shtuar patrullimet vëzhguese në veri të Kosovës, për ta përmirësuar gatishmërinë e misionit. Për më shumë, këshilltarët e lartë të Policisë në veri janë të vendosur në objektin e Drejtorisë Rajonale – Veriu dhe në katër stacione të tjera të shërbimit policor. Sidoqoftë, na duhet ta theksojmë se EULEX-i nuk ka marrë kurrfarë përgjegjësie policore në veri të Kosovës”, ka shtuar EULEX-i.
Politikania serbe e Kosovës, Rada Trajkoviq, gjatë kësaj jave pati paralajmëruar në mediat serbe se me dorëheqjet e policëve, në veri mund të rritet rreziku nga forcimi i grupeve kriminale.
E në EULEX kanë thënë se Policia e Kosovës është duke i kryer dhe se është e vetmja që duhet t’i kryejë detyrat policore në veri.
