Ministri i Mbrojtjes, Armend Mehaj, ka thënë se situata aktuale politike në vend, rajon dhe më gjërë ishin tema të diskutimit gjatë takimit të mbajtur sot me këshilluesit e NALT dhe Atashetë e Mbrojtjes.
“Sigurisht theks të veçantë kishte çështja e sigurisë pas zhvillimeve të fundit në veri të vendit, të cilat vijnë si rezultat i dezinformatave të vazhdueshme të Beogradit zyrtar, luftës hibride me qëllim destabilizimin e vendit, dhe përdorimit të metodave të ndryshme të kërcënimit të pjesëtarëve të komunitetit serb për largim nga institucionet e Republikës së Kosovës”, ka shkruar ndër të tjera Mehaj.
Postimi i plotë i Mehajt:
Në KOORDINIM TË VAZHDUESHËM ME KËSHILLTARËT BILATERAL TË SHTETEVE PARTNERE DHE ATASHETË E MBROJTJES
Situata aktuale politike në vend, rajon dhe më gjerë ishin tema të diskutimi gjatë takimit të mbajtur sot me këshilluesit e NALT dhe Atashetë e Mbrojtjes.
Sigurisht theks të veçantë kishte çështja e sigurisë pas zhvillimeve të fundit në veri të vendit, të cilat vijnë si rezultat i dezinformatave të vazhdueshme të Beogradit zyrtar, luftës hibride me qëllim destabilizimin e vendit, dhe përdorimit të metodave të ndryshme të kërcënimit të pjesëtarëve të komunitetit serb për largim nga institucionet e Republikës së Kosovës.
Ngritja e kapaciteteve ushtarake të Serbisë përgjatë kufirit me Republikën e Kosovës shpërfaq tendencat e një shteti armiqësor, që përveçse nuk dënon, pëkrah e përdor metodat e agresorit rus, gjë që bie ndesh me normat dhe vlerat demokratike të cilat Republika e Kosovës si shtet evropian përqafon dhe mbron.
Veprimet e shtetit serb duhet dënuar nga çdo shtet evropian dhe më gjerë!
Republika e Kosovës është jashtëzakonisht mirënjohëse për kontributin e shteteve aleate dhe misionin e KFOR-it, që si gjithnjë edhe në situatën aktuale janë duke treguar gatishmëri të jashtëzakonshme për të bashkëpunuar me Policinë e Republikës së Kosovës në ruajtjen e qetësisë, sigurisë dhe stabilitetit në veri të vendit.
Qeveria e Republikës së Kosovës do të vazhdoj të garantoj integritetin territorial, mbrojtjen e jetës së qytetarëve, dhe ofrimin e shërbimeve të institucioneve për të gjithë qytetarët pa dallim etnie.
