Dhomat e Specializuara të Kosovës në Hagë, kanë rrëzuar ankesën e mbrojtjes, në lidhje me Driton Lajçin.
Për këtë çështje, gjyqtari rrëzoi kërkesën e dytë të mbrojtjes, e cila kishte kërkuar që gjykata të urdhërojë Zyrën e Prokurorit të Specializuar që të ndërpresë hetimin ndaj Lajçit.
Bazuar në vendimin e tij, gjykata nuk e vlerëson se kohëzgjatja e hetimit kundër Lajçit është e paarsyeshme, ashtu siç ka kërkuar mbrojtja.
Ky vendim sipas gjykatës, është marrë duke marrë parasysh kompleksitetin e këtij rasti.
Në nëntor të vitit 2019, është raportuar se Zyra e Prokurorit të Specializuar të Kosovës me seli në Hagë, ishte duke bërë hetime lidhur me rolin e Zyrës së Qeverisë së Kosovës (në Ministrinë e Drejtësisë) për mbrojtjen juridike të të akuzuarve potencialë pranë Dhomave të specializuara, si dhe drejtuesin e kësaj zyre, në atë kohë, Driton Lajçi, për pengimin e mundshëm të drejtësisë, përfshirë edhe pretendimet për shkelje të neneve të Kodit Penal të Kosovës, të cilat kanë të bëjnë me pengimin e provave ose procedurave zyrtare dhe frikësim gjatë kryerjes së procedurës.
Kjo është pjesë e një dokumentit që ka të bëjë me kërkesën e avokatit të Lajçit, për të vlerësuar kushtetutshmërinë e procesit të intervistimit.
Lajçi ishte marrë në pyetje në Hagë, më 17 tetor 2019, duke u mbrojtur në heshtje, ndërkaq që avokati i tij, Toby Cadman, kishte konfirmuar në atë kohë për Radion Evropa e Lirë, që pranë Dhomës së Specializuar të Gjykatës Kushtetuese të Kosovës me seli në Hagë, ka paraqitur kërkesën lidhur me kushtetutshmërinë e procedurës gjatë intervistimit, që është edhe pjesë e dokumentacionit publik.
