Bujar Bukoshi, ish- kryeministër i Qeverisë së Kosovës në mërgim e më pas pjesëmarrës aktiv në jetën politike duke qenë ministër dhe zëvendëskryeministër në Kosovën e pasluftës, prej vitesh është larguar nga skena politike.
Edhe pse i larguar nga jeta publike prej disa vitesh, Bukoshi foli tani për perspektivën e Kosovës në raport me zhvillimet ndërkombëtare, mandej përballjen e ish- udhëheqësve politikë të UÇK-së me Gjykatën Speciale dhe rëndësinë e ruajtjes së identitetit shtetëror të Kosovës.
Ish- kryeministri Bujar Bukoshi ka folur për gazetën Tema lidhur me akuzat me të cilat po mbahen ish-krerët e UÇK-së në Hagë, përfshirë këtu edhe transplantimin e organeve njerëzore.
Ai tha se kush i përgjigjet atij që është marrë me transplant të veshkave në vitin 1984 në Klinikën Steglits në Berlin.
“Fundi fundit, ju lutem shumë, ku janë ato organe të famshme të trafikuara, me akuzën primordiale me të cilën Kosova burgoset në Hagë ? A mund të më përgjigjet dikush mua që jam marrë edhe me transplantime të veshkës në Klinikën Steglitz në Berlin më 1984 ?
Ku janë ata transplantologët e shtëpisë së verdhë, atje ku arusha e çon postën ? Shteti shqiptar ( me vonesë) po e ngritë këtë pyetje dhe mirë po bën”, tha ai.
