Disa lloje të kancerit të gjirit mund të kurohen pa rrezatim, tregojnë rezultatet e një studimi të ri të shkencëtarëve kanadezë të publikuar në takimin vjetor të Shoqatës Amerikane të Onkologjisë Klinike në Çikago.
Gratë mbi 55-vjeç, të cilat janë diagnostikuar me një lloj të caktuar të kancerit të gjirit në një fazë të hershme, mund t’i nënshtrohen operacionit dhe më pas terapisë hormonale, thonë autorët e studimit.
Kreu i studimit, profesor Timothy Whelan pranë Universitetit McMaster në Kanada, e quajti zbulimin “të madh” sepse tregon se disa gra mund të shmangin me siguri rrezatimin dhe efektet anësore të tij.
Studimi, i prezantuar në takimin vjetor të ASCO (Shoqëria Amerikane e Onkologjisë Klinike) në Çikago, studioi rezultatet tek gratë që kishin kancer të gjirit luminal të shkallës së ulët të tipit A, një kancer me një shënues gjenetik specifik.
Një grupi prej 500 pacientësh iu hoqën kancerin e gjirit me kirurgji dhe më pas morën terapi hormonale. Më pas ata u ndoqën për pesë vjet për të vlerësuar nëse kanceri i gjirit po kthehej.
Studiuesit zbuluan se rikthimi ishte vetëm 2.3 për qind pa rrezatim. Kjo është e krahasueshme me 1.9 për qind të rikthimeve në rastin e kancerit të gjirit të pa trajtuar.
Whelan tha se në fazat e hershme të kancerit të gjirit, radioterapia prej tri deri në pesë javë në përgjithësi përdoret për të zvogëluar rrezikun e përsëritjes.
“Këto gjetje janë të shkëlqyera sepse ne kemi identifikuar një grup specifik pacientësh që mund të shmangin radioterapinë dhe efektet anësore të lidhura me to, dhe kjo hap potencialin për praktikë më të mirë mjekësore në trajtimin e kancerit të gjirit,” tha ai.
“Radioterapia ka efekte anësore të mëdha, duke përfshirë lodhjen, rraskapitjen dhe acarimin e lëkurës, të cilat mund të zgjasin për disa javë pas përfundimit të ciklit, dhe ka efekte anësore të mëvonshme që ndikojnë në cilësinë e jetës si dhe komplikime serioze shumë të rralla si sëmundjet e zemrës dhe kancere të tjera.
“Nëse mund të shmangim radioterapinë, aq më mirë, sepse jo të gjithë llojet e kancerit kërkojnë të njëjtin nivel terapie shpesh invazive”, tha Whelan./kp/
