Strategjia e Sigurisë së Kosovës për vitin 2022-2027 ka shkaktuar përplasje në Kuvendin e Kosovës. Madje, deputetët debatuan edhe në lidhje me atë se kush e do më shumë Amerikën dhe NATO-n. Por, këtë debat deshi ta ‘shuaj’ kryetari i Kuvendit të Kosovës, Glauk Konjufca, i cili kërkoi nga deputetët që të mos shtyhen në Kuvend për atë se kush e do më shumë NATO-n dhe ShBA-të.
Deputeti nga radhët e Aleancës për Ardhmërinë e Kosovës, Besnik Tahiri është deklaruar në lidhje me Strategjinë e Sigurisë së Kosovës për periudhën 2022-2027.
Tahiri ka thënë se në dokument nuk flitet askund për synimin strategjik, i cili sipas tij është anëtarësimi në NATO.
“Kurrkund nuk flet për synimin strategjik. O njerëz, synimi jonë, i kësaj strategjie është me hy në NATO, me u siguru një herë e përgjithmonë në politikën armiqësore të Serbisë. Kjo strategji nuk është strategji, ky është dokument analitik, por nuk e jep drejtimin”, ka deklaruar Tahiri.
Në anën tjetër, deputeti nga LVV-ja, Enver Dugolli i ka shpjeguar deputetit Tahiri, se në dokument përmendet anëtarësimi i Kosovës në NATO.
“Shihet se nuk e ka lexu strategjinë, por unë po ia lexoj ku thotë se ‘Kosova ka synim të pazëvendësueshëm anëtarësimin dhe integrimin në NATO dhe mekanizma që sigurojnë strategjike afatgjate”, është shprehur Dugolli.
Ndërkaq, kryetari i Kuvendit, Glauk Konjufca ka kërkuar nga deputetët të mos shtyhen për NATO- apo Shtetet e Bashkuara të Amerikës, pasi sipas tij “të gjithë i duan njësoj”.
“Unë veç e kam një lutje, për gjithçka shtyhuni në këtë Kuvend, veç më duket shumë e kotë me u shty për NATO-n dhe Shtetet e Bashkuara të Amerikës mes veti, se konsideroj që i duam njëjtë secili këtu. Ata që nuk i duan, si grup parlamentar, nuk janë në Parlamentin e Kosovës hiç, nuk po marrin pjesë. Ju të tjerët, si njëjtë më dukeni të gjithë kështu”, tha Konjufca.
Në kundërpërgjigje të Konjufcës, deputeti Besnik Tahiri tha se tema nuk është për dashurinë ndaj NATO-s, por për qartësinë në dokumentit të Strategjisë së Sigurisë.
“Nuk ka të bëjë këtu kush po e dashuron [NATO] më shumë ja kush ka bo më shumë për siguri, ja kush e ka themelu ushtrinë, a kush ka ndërtu marrëveshje bilaterale apo kush ka dhënë kontribut në zhvillimin e Kosovës, nuk ke kjo tema se ajo dihet. Tema është që në këtë dokument qartësia milimetrike e synimeve strategjike të këtij vendit duhet të jetë, për shkak se fjalët i merr era e ato të shkruarat mbesin në dokument”, është përgjigjur Tahiri.
Deputetët e Kuvendit të Kosovës po shqyrtojnë Strategjinë e Sigurisë së Kosovës, për periudhën 2022-2027.
