Kuvendi i Kosovës ka filluar punimet dhe aktualisht po shqyrtohet Strategjia e Sigurisë së Kosovës 2022-2027, të cilin e prezantoi kryeministri, Albin Kurti.
E me nje fjalë rasti për këtë dokument është parqitur edhe deputeti nga radhët e AAK-së, Bekë Berisha, i cili e ka quajtur dokument të dobët Strategjinë Kombëtare të Sigurisë për periudhën 2022-2027.
Ai gjatë fjalimit të tij e përdori edhe një fjalë me të cilën e përqeshi strategjinë.
“Kjo strategji është dokument frankshtajn, do të thotë i përbërë prej dokumenteve paraprake, po ashtu të dobëta, por sikur i përforcuar pak nga fjalimet e kryeministrit”, tha Berisha, para se ta ndërpriste kryekuvendari Glauk Konjufca.
“Z. Berisha ne patëm raportin e komisionit, a ka mundësi ju lutem…”, tha Konjufca.
Në fund të fjalimit, Konjufca i tha deputetit Berisha se e keqpërdori foltoren.
Kurse paraprakisht kryeministri Kurti ka thënë se kjo është strategjia ombrellë e sektorit të sigurisë që njeh rreziqet, kërcënimet dhe sfidat për sigurinë e Republikës së Kosovës.
“Kjo strategji do të prodhoj plane dhe dokumente që lidhen me sigurinë kombëtare, publike, mbrojtjen dhe diplomacinë”, ka thënë Kurti.
Kryeministri ka shtuar se synimi i Kosovës është anëtarësimi në NATO dhe BE.
“I kemi dhënë vëmendje institucioneve të sigurisë, kemi rritur buxhetin e FSK për 52%. Kemi ndarë buxhetin më të lartë në historinë e FSK-së. Ky buxhet është vendosje e një standardi të ri për trajtimin e Forcave të Armatosura dhe çështjeve të sigurisë. Kemi treguar seriozitetin me të cilin e shohim sigurinë në vend. Buxhetit të rritur për ushtrinë po i shtohen edhe mjetet e dhuruara në Fondin e Sigurisë nga qytetarë anë e kënd botës”, ka thënë Kurti.
Kurti ka shtuar se krahas rritjes së buxhetit të FSK dhe krijimit të Fondit të Sigurisë kemi përshpejtuar blerjet ushtarake, kemi krijuar linja të reja të furnizimit me sisteme të armatimit.
“Kemi themeluar grup punues për anëtarësim në NATO. Ne synojmë anëtarësim sa më shpejt në PPP dhe mekanizma të tjerë ndërkombëtarë të sigurisë. Po punojmë për aplikimin e Kosovës për statusin kandidat në BE”, ka thënë Kurti.
Kuvendi i Kosovës sot do të vazhdojë seancën plenare, me disa nga pikat e rendit të ditës, që nuk kaluan seancën e fundit.
Kuvendi do të ketë në rend dite, votimin e Projektligjit për masat e përkohshme të produkteve themelore në raste të veçanta të destabilizimit në treg, i cili në seancën e kaluar në mungesë kuorumi gjatë procesit të votimit nuk pati vendimmarrje për të./KosovaNeës/
