Presidentja e Kosovës, Vjosa Osmani, për qarkullimin e një drafti franko-gjerman në media ka thënë se “ka dezinformata rreth asaj që po kërkojnë partnerët”.
Derisa ka komentuar opinionet se “pranimi i këtij draft-propozimi e kthen vendin në negociata për marrëveshje përfundimtare pas dhjetë vjetësh”, Osmani ka theksuar se një gjë të tillë nuk e ka propozuar askush.
“Nuk ka propozuar askush që të pritet për marrëveshje për dhjetë vjet, kështu që ka lloj insinuatash, dezinformatash lidhur me atë se çfarë po kërkojnë partnerët tanë prej nesh”, ka thënë Osmani për KosovaPress.
Sipas Osmanit, qëllimi i Kosovës është për marrëveshje finale me njohje në qendër të saj, por që angazhimi i Serbisë është i kundërt.
“Ne e vlerësojmë rolin e partnerëve tanë për intensifikimin e dialogut Kosovë-Serbi. Qëllimi i Kosovës gjithnjë ka qenë për marrëveshje finale dhe njohje në qendër, dhe ne angazhohemi në atë drejtim. Për me tepër angazhimi ynë është për paqe dhe stabilitet, ndërsa angazhimi i Serbisë është i kundërt. Andaj shpresojmë që sa më shumë të jetë e mundur partneret tanë të bëjnë presion Serbisë, shtetit që po e destabilizon rajonin tonë që ta kuptojë që paqja dhe stabiliteti është në interes te të gjithëve”, është shprehur Osmani.
