Qeveria e Kosovës konsideron se e ka për obligim sundimin e ligjit kur bëhet fjalë për shtyrjen e afatit edhe për 10 muaj për konvertimin e targave ilegale në RKS, kërkesë kjo e cila është paraqitur nga i dërguari i SHBA-së për Ballkanin Perëndimor, Gabriel Escobar.
Zëdhënësi i Qeverisë, Përparim Kryeziu ka thënë të enjten për KOHËN se e kuptojnë shqetësimin e Escobarit, mirëpo ka shtuar se Qeveria ka obligim për sundim të ligjit dhes se as njëra nga këto nuk bën ta përjashtojë tjetrën.
“Ne i kuptojmë shqetësimet dhe brengat e zëvendës Ndihmës Sekretarin për Çështje Evropiane dhe Euroaziatik edhe përfaqësuesit amerikan për Ballkanin Perëndimor, z. Gabriel Escobar dhe i ndajmë po ato me të, sepse siguria e paqja janë vlera dhe interes jetik e i përbashkët. Njëkohësisht, ne kemi për obligim sundimin e ligjit, kushtetutshmërinë, vendimet qeveritare. Njëra nuk bën ta përjashtojë tjetrën. Nuk është data 31 e as 30 tetor sot. Jemi në kuadër të fushatës për konvertimin e targave ilegale në ato legale RKS. Ju bëjmë thirrje përsëri qytetarëve serbë të Kosovës që t’i konvertojnë targat duke përfituar nga lirimi tatimor e doganor”, ka thënë Kryeziu.
Ministria e Punëve të Brendshme (MPB) ka thënë në një përgjigje për KOHËN të enjten se prej kur ka filluar regjistrimi i automjeteve, deri sot 13 automjete janë regjistruar nga targat ilegale në ato RKS.
“Regjistrimet janë bërë në komuna të ndryshme. Nga regjioni 06 – kemi 5 automjete, nga regjioni 02- kemi 4 automjete, nga Regjioni 04 – kemi 2 automjete dhe nga regjioni 01 – kemi 2 automjete”, ka thënë MPB-ja.
