Deri tani pesë persona janë arrestuar pas një operacioni të Policisë së Kosovës kundër fajdeve, i cili ka filluar rreth orës 6:00 të mëngjesit në qytetin e Gjakovës dhe në rrethinë të saj, raporton KosovaNews.
Lajmin për arrestimet e ka konfirmuar zëdhënësi i Policisë së Kosovës për rajonin e Gjakovës, Lumni Graishta.
Sipas tij, në këtë operacion i cili po zhvillohet në shtatë lokacione janë konfiskuar armë, automjete si dhe prova të tjera që lidhen me veprën “fajde”.
“Aksioni ka filluar rreth orës 06:00 të mëngjesit në shtatë lokacione, në Gjakovë dhe rrethinë të saj. Janë arrestuar pesë persona si dhe janë konfiskuar armë, vetura dhe prova të tjera që lidhen me veprën”, ka thënë Graishta.
Njësitet e Policisë së Kosovës mëngjesin e sotëm kanë nisur një aksion në Gjakovë.
Aksioni po zhvillohet në disa pika dhe ka të bëjë me luftën kundër fajdexhinjve.
Me fillim të aksionit zëdhënësi i Policisë, Sheremet Elezaj pohoi se aksioni në fjalë po zhvillohet në bashkëpunim me Prokurorinë.
