Drejtori i Institutit Epik, Demush Shasha, e ka lidhur liberalizimin e vizave për Kosovën me rritjen e numrit të hyrjeve ilegale në Bashkimin Evropian përmes Ballkanit Perëndimor.
Në një postim në Facebook, Shasha ka thënë se të dhënat e fundit nga FRONTEX, the Europian Border and Coast Guard Agency, konfirmojnë se numri i hyrjeve ilegale në BE në nëntë muajt e parë të këtij viti janë rritur 70 për qind krahasuar me vitin e kaluar.
“Ky është rekordi i hyrjeve ilegale në BE-që për nëntë muaj të parë që nga viti 2016; dhe gjysma e këtyre kalimeve ilegale kanë hyrë në BE përmes Ballkanit Perëndimor. Krahasuar me vitin e kaluar kjo është rritje prej 170% të hyrjeve ilegale përmes rajonit tonë. Sirianët dhe Afganët kanë qenë shtetësi kryesore migruese”, ka shkruar Shasha.
Ai ka shtuar se sipas Analizës së Riskut Strategjik 2022 të FRONTEX-it, në skenarët e krizave të mëdha në fqinjësinë e BE-së do të kërkohet shtrëngimi i kontrolleve kufitare në Ballkanin Perëndimor.
“E gjithë kjo nuk ka të bëjë asgjë ekskluzivisht me Kosovën. Ky është problem i gjithë rajonit. Kam thënë edhe në maj të këtij viti: sa shpenzojmë energji të panevojshme në diskutime të llojit Procesi i Berlinit vs Ballkani i Hapur, para vetës kemi një krizë në rritje e cila kërkon vëmendjen dhe bashkëpunimin e të gjitha vendeve të rajonit”, ka thënë më tej ai.
