Lëvizja Vetëvendosje (LVV) vlerëson se Raporti i Progresit i këtij viti i Komisionit Evropian për Kosovën është më i miri që nga viti 2018 kur ka nisur të vlerësohet puna e institucioneve të Kosovës nga ky organ i BE-së.
Deputetja e LVV-së, Fitore Pacolli, ka thënë të shtunën në një konferencë për media se për herë të parë, Komisioni Evropian ka evidentuar progres, derisa nuk ka evidentuar regres në asnjë fushë.
Pacolli ka thënë po ashtu, se për herë të parë, ky raport nuk evidenton ndërhyrje politike në sistemin e drejtësisë dhe në aspektet e tjera.
“Nga 14 raporte ky është raporti me i mirë në krahasim me vitet e kaluara dhe më i miri në krahasim me shtetet e rajonit, ky është raporti i parë ku nuk evidentohet ndërhyrje politike në sistemin e drejtësisë, administratës publike, sidomos në punësimin e shërbyesve civilë, në transmetuesin publik, dhe në institucione e agjenci të pavarura. Në të gjitha raportet kaluara ndërhyrjet politike evidentoheshin këto fenomene shqetësueses. Ky është raporti i parë ku evidentohet shumë më shumë progres dhe nuk evidentohet regres dhe kthim prapa”, ka thënë Pacolli.
Sipas saj, edhe sa i përket punës së Kuvendit, ka progres, pasi siç ka thënë, Kuvendi ka thyer rekorde me numrin e ligjeve të miratuara.
“Kuvendi ka thyer rekorde me numrin e ligjeve të miratuara, marrëveshjeve ndërkombëtare të ratifikuara dhe nismave legjislative. Gjatë periudhës raportuese, qershor 2021- qershor 2022, Kuvendi ka miratuar 123 ligje prej të cilave 31 marrëveshje ndërkombëtare ndërsa viteve të tjera maksimumi i ligjeve ka të miratuara qenë 50 ligje. Një pjesë e madhe e ligjeve janë prioritet për agjendën evropiane ndërkaq një pjesë tjetër janë të rëndësisë jetike. Kemi përfunduar rregulloren e Kuvendit e cila nuk është ndryshuar që nga viti 2011 dhe kemi filluar reformën zgjedhore që ka qenë kërkesë e BE-së”, është shprehur ajo.
Ndërsa, Armend Muja, foli po ashtu rreth raportit dhe drejtimit të Kosovës drejt Evropës, dhe për sfidat e saj
‘’Kosova është duke ecur drejt evropianizimit e në Serbi me pro rusi. Gjatë kësaj kohe, Kosova kishte sfida sa i përket covid-19. Ajo çka evidentohet në raport është kalimi i disa ligjeve ne “çkapjen e shtetit”.
Ky është raporti i vetëm që nuk ka të theksuar favorizimet partiake në borde apo organe të pavarura’’, tha Muja.
