Fondi i Kombeve të Bashkuara për Fëmijët (UNICEF) ka reaguar pasi greva në arsim ka hyrë në javën e pestë, duke thënë se është thellësisht i shqetësuar më këtë vonesë në fillimin e vitit shkollor. UNICEF-i ka reaguar ndaj vazhdimit të grevës së arsimit në Kosovë, duke kërkuar që të ndërpritet ajo.
UNICEF-i përmes një komunikate për media ka thënë se vonesa në fillimin e vitit të ri shkollor është veçanërisht shqetësuese duke pasur parasysh fokusimin në kompensimin e humbjeve si pasojë e pandemisë me COVID-19.
“Jemi duke e përjetuar një krizë globale në mësimnxënie, me gati dy të tretat e fëmijëve të moshës 10-vjeçare që nuk janë në gjendje ta lexojnë dhe kuptojnë një tekst të thjeshtë dhe privimi i vazhdueshëm i të drejtës për arsimim mund të ketë pasoja serioze në arritjet arsimore, shëndetin mendor dhe mirëqenien e fëmijëve”, thuhet në komunikatë.
UNICEF-i kërkon që të vihet në plan të parë interesi i fëmijëve dhe të kthehet sa më shpejtë procesi mësimor.
Sindikata e Bashkuar e Arsimit ka thënë, më 28 shtator, se i është drejtuar anëtarësisë greviste me një shkresë, përmes të cilës u ka kërkuar të japin mendimin e tyre për idenë që të pezullohet greva në arsim.
Si pasojë e grevave që kanë nisur në sektorin e arsimit më 25 gusht, mbi 300.000 nxënës kanë mbetur pa mësim.
Në fillim të këtij muaji, Qeveria e Kosovës ka paraqitur një pako për përballje me inflacionin, në kuadër të së cilës punonjësit e sektorit publik, përfshirë mësimdhënësit, përfitojnë nga 50 euro shtesë, nisur nga ky muaj./KosovaNews/
