Asamblisti i Aleancës për Ardhmërinë e Kosovës (AAK), Bajram Kastrati, në Prizren, i ka ftuar prindërit që t’i dërgojnë fëmijët e tyre në shkollë, pavarësisht grevave që tash e disa javë kanë marrë peng arsimin në vend, shkruan KosovaNews.
“Të dashur prindër të lagjes Arbanë, ju ftoj nga nesër t’i dërgojmë fëmijët në shkollë. Duke pasur parasysh kërkesat e arsyeshme të arsimtarëve dhe duke respektuar ata, konsideroj se kemi pritur mjaft dhe kemi sakrifikuar shumë me fëmijë. Pa dashur të politizoj, por po vërehet qartë edhe “gatishmëria” e qeverisë për të bërë zgjidhje!”, ka thënë Kastrati.
Përmes një postimi në facebook, ai u ka bërë thirrje mësimdhënësve të mos i sakrifikojnë fëmijët dhe të gjejnë forma tjera të protestës.
“Arsimtarë të nderuar, përkrahjen tonë e keni, por ju lusë të gjeni forma tjera të protestës, jo duke sakrifikuar fëmijët tanë. Edhe njëherë ftoj të gjithë prindërit dhe arsimtarët (që shumica prej tyre edhe vetë janë prind), që nga nesër t’i kthejmë nxënësit në shkollë dhe atë vetëm për hirë të fëmijëve.
Me respekt…”, thuhet në reagimin e Kastratit.
Ky është postimi i plotë i Kastratit:
