Sindikata e Bashkuar për Arsim, Shkencë e Teknologji (SBASHK), ka thënë se Qeveria nuk po do dialog e zgjidhje të kërkesave të grevistëve.
Ndonëse është dita e 26-të e grevës dhe drejtuesit e SBASHK-ut nuk po lëshojnë pe dhe po mbajnë gjithë sistemin arsimor të bllokuar, janë disa shkolla në qytete të ndryshme të vendit që po thyejnë grevën dhe e kanë filluar vitin e ri shkollor.
E sot njëri nga udhëheqësit e Këshillit Grevist, përgjegjësi i shërbyesve civilë, Ali Sefaj, në një postim në Facebook, ka thënë se ka ardhur koha për reflektim, dhe se mësimi duhet filluar.
Duket se presioni nga prindërit që t’i dërgojnë fëmijët në shkolla e kopshte, si dhe këto mospajtime brenda Këshillit Grevist e kanë shtyrë SBASHK-un që të del edhe me një reagim për media, e ku sërish e ka fajësuar ekzekutivin, duke thënë se Qeveria Kurti ka zgjedhur rrugëtimin e përbuzjes, nënçmimit e linçimit përmes deklaratave.
“SBASHK-u ishte dhe mbetet sindikatë e atyre që e kanë lirinë e plotë të mendimit dhe të votës së lirë. I kthyer në kujtesën e ngjarjeve të shënuara e filmuara nga mediet, ky realitet dëshmon se greva kishte edhe në Qeveritë e kaluara në Kosovën e pasluftës, por kurrë nuk kishte goditje të ulëta e të turrit të militantëve partiakë me sharje, përbuzje e linçime siç po ndodh tani e sa kohë nga Qeveria e tellallët e saj. Qeveria Kurti nuk do dialog e zgjidhje të kërkesave të grevistëve, kërkesa këto të prezantuara e të mohuara e të injoruara tani e sa muaj, por do rrugëtimin e vetë të përbuzjes, nënçmimit, linçimit përmes deklaratave, që pastaj shumëfishohen e pasurohen nga militantë nëpër Facebook”, thuhet në reagimin e SBASHK-ut.
SBASHK ka kritikuar kryeministrin Albin Kurti, duke thënë se po i nënshtrohet tekave të veta, e nuk po dëshiron debat me grevistët dhe se po përqesh.
Në komunikatën e Sindikatës, thuhet se një numër i mësimdhënësve, të cilët ka thënë se ia kanë bërë qejfin pushtetit, janë kthyer në punë dhe se është zgjedhje e tyre e lirë.
“Duke parë gjithë këtë luftë kundër zërit sindikal të anëtarësisë e duke demantuar me fakte e argumente se as SBASHK e as Sindikata e shërbyesve civilë nuk kanë vepruar kurrë e as nuk veprojnë si Qeveria tani me shantazhe e kërcënime ndaj grevistëve, po respektojnë vullnetin dhe zërin e anëtarësisë e për ta lehtësuar plagën në shpirtrat e një numri të vogël të anëtarësisë, që nga presionet e vazhdueshme të qeveritarëve po ndahen nga mijëra e mijëra kolegë grevistë dolëm dhe e treguam publikisht se SBASHK ka frymuar dhe vazhdon të frymojë lirshëm dhe se ishte dhe mbetet shembull i shkëlqyer i demokracisë. Mbetet i tillë edhe tani karshi presioneve të papara të Qeverisë e një pjese të fansave të saj, që kanë humbur njerëzoren dhe krenarinë e traditën e kombit tonë. Ju numri tepër i vogël i kolegeve e kolegëve tanë që po ia bëni qejfin pushtetarëve sot është zgjedhje e lirë juaja, por kolegët tuaj në kohë të tjera kur qeverisnin partitë që ata i kishin votuar, qëndronin të pa luhatur në grevat e tyre për të realizuar kërkesat legjitime e duke ruajtur unitetin me moton Bashkë e në SBASHK”, thuhet nga SBASHK-u.
Nga SBASHK thonë se Qeveria me angazhime konkrete duhet të dëshmojë se është e shqetësuar vërtetë për gjendjen e krijuar.
“Mijëra të punësuar në arsim që nga çerdhet e deri në universitete dhe ata në shërbimet publike vazhdojnë të qëndrojnë dinjitetshëm në grevën, që nuk e deshën, por erdhën deri te ajo pasi që Qeveria injoroi e po injoron dialogun serioz dhe kërkesat e tyre. Qeveria me angazhime konkrete e vendime të pranueshme për të dy palët duhet të dëshmohet se është e shqetësuar vërtetë për gjendjen e krijuar. Ajo, në vend të kësaj, vazhdon me presionet ndaj grevistëve dhe tregon se qëllimi i saj, sikur është, futja e përçarjes dhe ngulfatja e zërit sindikal. Këtë askush nuk e ka arritur deri tani e nuk do ta arrij dot as kjo Qeveri. Edhe kjo sfidë do të kalojë dhe mjerë ata që do të ulin kokën nga turpi”, thuhet në reagim.
