Presidenti i Serbisë, Aleksander Vuçiq sot është marrë personalisht me ministrin e Brendshëm të Kosovës, Xhelal Sveçla, pasi ky i fundit i ka çuar një selam dje, duke i thënë se do të ketë ditë të vështira, sepse rendi e ligji do të mbizotërojnë në Kosovë.
Në një konferencë të përbashkët me kryeministrin hungarez Viktor Orban, presidenti serb, Aleksander Vuçiq tha se Sveçla “e ka kërcënuar”.
“Më ka kërcënuar ai piuni i Kurtit. S’kam problem me të, veç le të vazhdojë të kërcënojë”, ka thënë Vuçiq.
Ai tha se e di që ditë të vështira janë para tyre, raporton B92.
“Është e rëndësishme që ata kanë gjëra të lehta para tyre. Ata po ia dalin mirë me ndërprerjet e energjisë, është vërtet e lehtë dhe e këndshme për ta, dhe do të jetë vetëm e lehtë dhe e këndshme për ta… Epo, le të kërcënojnë”, ka thënë Vuçiq.
Ai shtoi se i pëlqente gjithmonë kur dikush i kërcënonte dhe se kurrë nuk do të donte që ata të kërcënonim dikë.
“Vetëm le të kërcënojë, le të vazhdojë, ai është shumë i rrezikshëm dhe i rëndësishëm dhe le të vazhdojë me të njëjtin ritëm”, shtoi me ironi Vuçiq.
Sveçla i çon selam Vuçiqit: Do të kesh ditë, javë e muaj të vështirë
Ministri i Punëve të Brendshme të Kosovës, Xhelal Sveçla i ka çuar dje selam presidentit serb, Aleksandër Vuçiq, pasi ky i fundit tha se po tentohet “t’i merret Kosova, porse Serbia nuk do të lejojë t’i merret asnjë copë tokë”.
Sveçla i tha atij se do të ketë ditë, javë e muaj të vështirë, ndërsa theksoi se stabiliteti në territorin e Kosovës do të fuqizohet edhe më shumë.
“Sa i takon aspiratave shoveniste të Vuciqit në raport me Kosovë, unë mund t’i premtojë ditë të vështirë, javë të vështira, muaj të vështira për të. Sa i përket stabilitetit të Kosovës, ai stabilitet do të fuqizohet. Rendi dhe ligji veçse do të mbizotërojë atje edhe më shumë. Dhe shumë shpejt ne do t’i ofrojmë shanset që secili qytetar i asaj zone të jetojë i qetë”, tha ai në Syri tv.
