Ministrja e Drejtësisë, Albulena Haxhiu dje ka paralajmëruar se do ta paraqes në polici një person, i cili ishte tallur me fëmijët e dhunuar.
E në një reagim që vëri sot, ministrja Haxhi ka theksuar se pedofilët dhe ata të cilët i normalizojnë e tallen me këto krime nuk dallojnë dhe aq.
“Relativizimi dhe përqeshja e pedofilisë, vetëm sa do ta rëndojë situatën dhe do t’i shtojë pedofilët e do ta normalizojë këtë krim!”, ka shkruar Haxhiu.
Kujtojmë se dje një person me emrin Korab Blakaj nëpërmjet rrjetit social në Facebook është tallur me fëmijët e dhunuar, duke shkruar shaka se kinse ai në moshën 14-vjeçare ishte dhunuar seksualisht nga dy gra në një dasmë.
“Në vitin 2000, në moshën 14 vjeqare më kanë dhunuar seksualisht dy gra në një dasëm! Prokuroria i ka lënë të lirë, sot e asaj dite enden të lira duke kërkuar viktimat fatkeqe të radhës! Postimin e bëj publik me leje të Ministres Albulena Haxhiu”, ka shkruar Blakaj duke etiketuar ministren Haxhiu.
E pas kësaj në reagimin e saj, ministrja Haxhiu ka paralajmëruar Blakajn se qysh nesër këtë rast do ta raportojë në polici.
“Personat e tillë që tentojnë të tallen me fëmijët e dhunuar, duhet të ndiqen penalisht dhe qysh nesër do ta raportoj në polici!”, ka shkruar ajo.
Paraprakisht, Haxhiu kishte bërë një postim ku tregoi se prindi i një vazje 14-vjeçare ka rrëfyer sot te ajo, se ndaj vajzës së tij në vitin 2021 kishte pasur një tentim dhunim.
“Sot, prindi i një vajze 14 vjeçare, erdhi në Ministrinë e Drejtësisë, na njoftoi që në dhjetor të vitit 2021, ka pasur tentim dhunim të vajzës së tij 14 vjeçare. Ndonëse emri dhe mbiemri i personit të dyshuar dihet, i njëjti nuk është dënuar dhe as nuk është në burg. Personi i dyshuar është i lirë! *Postimi më lartë është bërë me lejen e prindit”, ka shkruar ajo.
