Ramush Haradinaj , kryetar i Aleancës për Ardhmërinë e Kosovës, ka reaguar pas deklaratës së presidentit serb Vuqiç, duke thënë se Rahoveci është kryeqytet rajonal i verërave.
Haradinaj ka shkruar në Facebook se vendi ynë është shumë hapa para Serbisë në prodhimin e verërave.
“Kosova ka qenë dhe është shumë hapa para Serbisë në prodhim të verërave. Mbajtja e Panairit të Verërave në Beograd dhe promovimi i tij në rajon, godet direkt biznesin e verarisë në Kosovë”, ka shkruar Haradinaj.
Haradinaj ka vazhduar me kritika ndaj qeverisë duke thënë se po e dënon panairin e Rahovecit, duke e përballur me mungesë të energjisë elektrike.
“Përderisa i bëhet kaq promovim panairit në Beograd, panairi në Kosovë dënohet me mungesë rryme, duke pamundësuar funksionimin normal.”, ka shkruar Haradinaj.
Në përgjigje të deklaratës së Vuçiq se “Beogradi është kryeqytet i verës” Haradinaj ka thënë se “Rahoveci është kryeqyteti i verërave në rajon”.
“Rahoveci është kryeqyteti i verërave në rajon, e që nesër si dhe çdo vit është nikoqir i ‘Hardh Fest’. Përkrahja e vreshtarëve tonë promovon punën e tyre dhe Kosovën në gjithë botën.”, ka shkruar Haradinaj.
