Kosova ka vendosur detyrim të përkohshëm antidamping prej 0.04 euro për kilogram ndaj importit të farës së grurit për mbjellje me origjinë nga Serbia.
Lajmin e ka bërë të ditur ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, përmes një postimi në Facebook.
Sipas Kusari-Lilës, vendimi është marrë pas një hetimi të zhvilluar nga ministria dhe dëshmive paraprake për importim me çmime dumping, si dhe për dëmtim të prodhuesve vendorë.
“Prodhuesi vendor nuk do të lihet i pambrojtur përballë konkurrencës së pandershme. Tregu ynë duhet të jetë i hapur, por edhe i drejtë”, ka shkruar Kusari-Lila.
Ajo ka paralajmëruar se institucionet do të përdorin të gjitha instrumentet ligjore në dispozicion për të mbrojtur prodhuesit vendorë, konkurrencën e ndershme dhe interesin ekonomik të Kosovës.
“Do të përdorim çdo instrument ligjor në dispozicion për të mbrojtur prodhimin vendor, konkurrencën dhe interesin ekonomik të Kosovës”, ka deklaruar ajo.
