Inspektorati Policor i Kosovës (IPK) ka njoftuar se ka arrestuar të mërkurën një zyrtar policor në Gjilan, nën dyshimin për veprat penale “sulm”, “lëndim i lehtë trupor” dhe “kanosje”.
Sipas IPK-së, hetuesit disa ditë më parë ishin njoftuar përmes një ankese në Zyrën Rajonale të IPK-së në Gjilan, lidhur me dyshimet se zyrtari policor, derisa ishte jashtë detyrës zyrtare, kishte kryer veprime të kundërligjshme.
Incidenti raportohet të ketë ndodhur më 13 gusht 2026, në rrugën “Lidhja e Prizrenit” në Gjilan, ku zyrtari policor, jashtë detyrës zyrtare, kishte qenë i përfshirë në një mosmarrëveshje me disa të rinj.
IPK, në koordinim me Prokurorinë Themelore në Gjilan, ka filluar hetim ndaj zyrtarit të dyshuar.
Pas veprimeve fillestare hetimore, zyrtari policor është arrestuar, ndërsa me vendim të prokurorit i është caktuar masa e ndalimit për 48 orë. IPK ka rekomanduar gjithashtu suspendimin e tij.
Veprimet e mëtejshme hetimore lidhur me rastin do të vazhdojnë nga hetuesit e IPK-së, në konsultim me prokurorin përgjegjës.
