Shoqata e Qumështoreve ka përkrahur aksionin e Inspektoratit të Ministrisë së Tregtisë dhe Industrisë (MTI) për kontrollin e produkteve të qumështit në treg, duke kërkuar një hetim të plotë dhe transparent për dyshimet e ngritura ndër vite rreth përdorimit dhe mosdeklarimit të vajit të palmës dhe qumështit pluhur.
Përmes një deklarate, Shoqata e cilëson aksionin e inspektoratit si një hap të domosdoshëm për mbrojtjen e shëndetit publik, garantimin e sigurisë ushqimore dhe vendosjen e rendit e ligjshmërisë në treg.
Sipas saj, çdo veprim institucional që synon largimin nga tregu të produkteve të falsifikuara, të maskuara ose të etiketuara në mënyrë mashtruese duhet të mbështetet.
“Mashtrimi i konsumatorëve dhe rrezikimi i shëndetit të tyre janë të papranueshme dhe duhet të marrin fund njëherë e përgjithmonë. Kosova nuk mund të jetë strehë e mashtrimit dhe e krimit. Qytetarët kanë të drejtë të konsumojnë produkte të sigurta, cilësore dhe të prodhuara në përputhje me ligjin”, thuhet në reagim.
Shoqata vlerëson se dyshimet serioze të ngritura ndër vite për përdorimin dhe mosdeklarimin e vajit të palmës dhe qumështit pluhur kërkojnë një hetim të pavarur, gjithëpërfshirës dhe transparent.
“Çdo fakt duhet të zbardhet, çdo përgjegjësi duhet të përcaktohet dhe çdo shkelje e ligjit duhet të marrë përgjigjen e merituar”, thuhet në deklaratë.
Më tej, Shoqata thekson se ajo që e quan një “sagë 15-vjeçare e mashtrimit” nuk mund të mbyllet pa u zbardhur deri në fund, duke kërkuar që çdo individ apo subjekt që ka mashtruar konsumatorët ose ka cenuar sigurinë ushqimore të përballet me drejtësinë.
Shoqata u bën thirrje Prokurorisë, Policisë së Kosovës dhe institucioneve të tjera kompetente që të zhvillojnë një hetim profesional, të paanshëm dhe të plotë, me qëllim identifikimin e të gjithë përgjegjësve dhe vendosjen e përgjegjësisë sipas ligjit.
Po ashtu, kërkohet që kontrollet në treg të vazhdojnë pa ndërprerje, me transparencë të plotë dhe pa asnjë kompromis ndaj shkelësve të ligjit.
Në përfundim, Shoqata e Qumështoreve thekson se vetëm e vërteta, drejtësia dhe zbatimi i barabartë i ligjit mund të rikthejnë besimin e qytetarëve te produktet e qumështit dhe të garantojnë që raste të tilla të mos përsëriten më. Sipas saj, vetëm një hetim i plotë, transparent dhe gjithëpërfshirës mund të zbulojë përmasat e dëmit të shkaktuar ndaj konsumatorëve, fermerëve dhe ekonomisë së vendit
