Fusha e re sportive afër shkollës fillore “7 Marsi” në lagjen Emshir të Prishtinës, e përfunduar vetëm pak ditë më parë, është mbushur me ujë pas reshjeve të para të shiut, duke u bërë e papërdorshme për fëmijët që mezi prisnin ta shfrytëzonin. Situata ka shkaktuar revoltë te banorët e lagjes, të cilët akuzojnë për punime me cilësi të dobët.
Ajo që u prit me entuziazëm nga fëmijët e lagjes u kthye shpejt në zhgënjim. Pas reshjeve të para të shiut, fusha u mbush me ujë, duke pamundësuar zhvillimin e aktiviteteve sportive.
“Gëzimi ynë nuk zgjati shumë, sepse fusha është punuar keq. Sa herë që bie shi, ajo mbushet me ujë”, u shpreh për portalin tonë një fëmijë me inicialet A. M.
Edhe një tjetër fëmijë, me inicialet A. S., thotë se fusha nuk mund të përdoret.”Si ta shfrytëzojmë kur sa herë që bie shi mbushet me ujë?”, tha ai.
Pakënaqësia është e madhe edhe te prindërit dhe banorët e lagjes, të cilët vlerësojnë se projekti nuk është realizuar sipas standardeve të nevojshme.
“Dikush duhet të marrë përgjegjësi për këtë punë. Komuna nuk duhet të lejojë punime të tilla, sepse ato financohen me taksat e qytetarëve”, tha një prind i lagjes me inicialet I. M.
Ndërkaq, një banor tjetër, me inicialet S. R., thotë se problemet nuk kufizohen vetëm te fusha sportive.
“Asgjë nuk është punuar si duhet. Rruga nuk është zgjeruar fare, parku ka mbetur në gjysmë, ndërsa më e keqja është fusha sportive, të cilën fëmijët nuk mund ta shfrytëzojnë pa u larguar më parë uji”, u shpreh ai.
Banorët kërkojnë nga Komuna e Prishtinës dhe kompania realizuese që të ndërhyjnë sa më shpejt për zgjidhjen e problemit të drenazhimit dhe të evidentojnë përgjegjësit për cilësinë e punimeve. Sipas tyre, një investim i financuar me taksat e qytetarëve nuk duhet të rezultojë i papërdorshëm menjëherë pas reshjeve të para të shiut.
